Kryetari i Lidhjes Demokratike të Kosovës, Lumir Abdixhiku, ka thënë se planifikojnë që të ketë eliminim të burokracisë për grante, sigurime bujqësore për fermerë dhe dyfishim të mbështetjes financiare për ta kur do të vijë në pushtet.
Gjatë një vizite te një fermer në Suharekë të shtunën, Abdixhiku ka thënë se puna e bujqësisë është punë fisnike e plot ndershmëri.
“Fermerë të palodhshëm, punëtorë të zellshëm, që nën nxehtësinë e ditëve të verës e freskive të mëngjeseve të hershme, krijojnë ushqimin tonë të përditshëm në secilën tavolinë. Familja Shala, në Suharekë, është e tillë. I vizitova ata. Bisedova me ta. Pashë se si të nëntë anëtarët e familjes punojnë tokën në përditshmërinë e tyre. Nga kjo punë fisnike, e ndershme e me plot dashuri, ata mbajnë veten, edukojnë fëmijët, ndërtojnë vendin. Dhe në këtë fisnikëri të tyre, njeriu gjenë dhe motovin politik. Atë që të shtynë të jesh me ta, në çdo hall e sfidë që kanë”, ka shkruar Abdixhiku në Facebook.
Kryetari i LDK-së ka thënë se nga vizita i ka kuptuar nevojat që ka kjo kategori.
“I kuptova nevojat që kanë. Të infrastrukturës, të ujitjes e të teknologjisë. Ndihmesa të vogla nga shteti që u japin shtytje të madhe përpara. Në planin tonë kemi paraparë: Eliminim të burokracisë për grante; Sigurime bujqësore për fermerë; Dyfishim të mbështetjes financiare”, ka shkruar Abdixhiku.
Ai ka falënderuar bujqit e palodhshëm që, sipas tij, formojnë rrënjët dhe vetë identitetin e shoqërisë sonë.
“Ne ju shohim, ju falënderojmë dhe jemi me ju. Do të bëjmë rrugën përpara së bashku me ju, në mënyrë që çdo farë e mbjellë të sjellë shpresë e zhvillim për ju e gjithë vendin”, ka thënë tutje Abdixhiku.
