Ministria e Shëndetësisë ka njoftuar se në 24-orëshin e fundit kanë ndodhur edhe 2 vdekje si pasojë e koronavirusit, ndërsa janë regjistruar edhe 1 mijë e 603 raste të reja me COVID-19 në Kosovë.
Në njoftimin e Ministrisë së Shëndetësisë bëhet e ditur se sot janë shëruar 1792 qytetarë.
Tashmë në total numri i rasteve aktive është 10 mijë e 639.
Sipas njoftimit, në 24-orët e fundit janë dhënë 142 doza të vaksinës kundër COVID-19.
Deri më tani, autoritetet shëndetësore kanë dhënë më shumë se 1.8 milion vaksina kundër këtij virusi.
Mbi 903 mijë banorë kanë marrë dozën e parë, mbi 824 mijë të dyja dozat, ndërsa edhe të tretën mbi 104 mijë.
Prej raportimit të rasteve të para me koronavirus, në mars të vitit 2020, autoritetet shëndetësore në Kosovë kanë regjistruar mbi 3 mijë vdekje.
Për koronavirusin e ri, që shkakton sëmundjen COVID-19, është raportuar për herë të parë në dhjetor të vitit 2019 në Vuhan të Kinës.
Organizata Botërore e Shëndetësisë e pati shpallur koronavirusin si pandemi më 11 mars të vitit 2020.
