Deputetja nga radhët e Partisë Demokratike të Kosovës, Blerta Deliu Kodra, ka thënë gjatë seancës së Kuvendit të Kosovës se pretendimet e PDK-së se Ministria e Infrastrukturës ka lidhur 42 kontrata për punë shtesë dhe disa kontrata një burimore, janë konfirmuar nga raporti i Zyrës Kombëtare të Auditimit.
Deliu-Kodra tha se raporti i Auditorit të Brendshëm u dha vulë pretendimeve të PDK-së për dallavere, paligjshmëri, korrupsion e hajni në MMPHI, duke kërkuar shkarkimin e ministrit Aliu dhe zëvendësministrit Hysen Durmishi.
Ky i fundit tha se të gjeturat e ZKA-së janë për projektet e qeverive të kaluara.
“Raporti i auditorit gjeneral i cili është publikuar nuk e ka asnjë të gjetur për asnjë projekt të infrastrukturës që është inicuar nga ne. Pra, të gjitha të gjeturat e auditorit gjeneral kanë të bëjnë me projektet e qeverive të kaluara të cilat i kanë iniciuar shokët dhe shoqet e Blerta Deliut”, tha për në një përgjigje për SHQIP.com, Durmishi.
Ai shtoi se Partia Demokratike e Kosovës ka kërkuar dorëheqjen në adresë të gabuar.
“Asnjë e gjetur për asnjë projekt që ka filluar në qeverinë Kurti 2 nuk ka në raport të auditorit gjeneral”, përfundoi Durmishi për Shqip.com.
Në seancën e sotme të Kuvendit të Kosovës, kas pasur një debat mes deputetes Deliu-Kodra dhe ministrit Aliu.
Aliu i tha se raportin e Auditorit të Brendshëm e kanë marrë seriozisht, dhe se një raport të tillë e kishte iniciuar vetë ai bashkë me zëvendësministrin Hysen Durmishi.
