Milorad Dodik mund të jetë një kandidat për president të Serbisë në zgjedhjet e ardhshme.
Kështu së paku pretendon nënkryetari i Partisë për Liri dhe Drejtësi (SSP), Borko Stefanoviq.
Sipas mediave serbe, përcjell Telegrafi, ai ka thënë se aktualisht po shqyrtohet opsioni që Milorad Dodik, i cili pas vendimit të Dhomës së Apelit të Gjykatës së Bosnjës dhe Hercegovinës nuk është më president i Republikës Srpska, të jetë kandidat për president të Serbisë në zgjedhjet e ardhshme.
Stefanoviq i tha televizionit Nova S se po “negociohet seriozisht”, pasi presidenti aktual i Serbisë, Aleksandar Vuçiq, nuk do të jetë në gjendje të kandidojë përsëri për këtë detyrë.
“Vuçiq dëshiron të jetë kryeministër, të kthehet në pozicionin e Kryeministrit, dhe ai po përgatit Dodikun, pasi ai ka shtetësi serbe dhe tani nuk mund të jetë president i Republikës Srpska”, citohet të ketë thënë Stefanoviq.
Ndërsa duke folur për protestat në Serbi, ai vlerësoi se paraqitja e Vuçiqit mbrëmë para ambienteve të SNS në Palilula, ku u thyen dritare, u arrestuan pa bazë dhe u rrahën të rinj, përfaqësoi “një përpjekje për të vazhduar gjendjen e jashtëzakonshme të pashpallur”.
Stefanoviqi beson se represioni i autoriteteve do të intensifikohet dhe ata do të përpiqen ta fusin nën termin “terrorizëm”, i cili përkufizohet shumë gjerësisht në ligj, këdo që del në protesta.
“E gjithë kjo është një prelud i një represioni të intensifikuar të regjimit në largim, i cili e shkatërroi Serbinë pothuajse plotësisht dhe është qeveria më e keqe në historinë e Serbisë. Pavarësisht se sa e vështirë është dhe pavarësisht se sa dhunë, arrestime dhe rrahje na vijnë nga ana tjetër, ne duhet të qëndrojmë të qetë, sepse një protestë paqësore, një protestë e mençur dhe shëtitja e policisë mbrëmë në Beogradin e Ri është një përgjigje shumë më e mirë”, tha Stefanoviqi.
