Milan dhe Inter në gjysmëfinalet e Champions. Një derbi për prestigj dhe lavdi. Një sfidë e përjetshme, duke ëndërruar rikthimin në finalen e Champions League.
Mbrëmjen e sotme zhvillohet ndeshja që të gjithë dëshirojnë ta luajnë.
Spektakli më i madh në botë zbret në San Siron e mbushur me kapacitet të plotë dhe me rekord përfitimesh nga biletat, plot 10 milionë euro.
Milani dhe Interi janë në momentin e së vërtetës.
“Do të jetë një sfidë mjaft e bukur. Njerëzit thonë se Interi është favorit, por ne kemi eliminuar Tottenham dhe Napoli. Mund të eliminojmë cilëndo skuadër. Në Champions nuk kemi pasur oshilacione, rrugëtimi ynë ka qenë i shkëlqyer. Duam të luajmë një finale, të cilën askush nga ne nuk e ka përjetuar”, tha Stefano Pioli, trajneri i Milanit.
Ndërkohë, tekniku i Interit Simone Inzaghi, u shpreh: “Është një gjysmëfinale Champions-i, është një derbi. Në fakt, ky është derbi i të gjitha sfidave derbi. E kemi të qartë sa i rëndësishëm është për të gjithë ne dhe duam të japim më të mirën. Duhet të luajmë me zemër, por edhe me logjikë. Humbja nuk është dështim. Nuk ka rëndësi nëse te Milani luan apo jo Leao, plani ynë nuk ndryshon”.
Leao është lojtari që po mban në ankth Milanin.
Nëse ylli portugez nuk ia del, ai do të zëvendësohet nga Saelemaekers.
Në anën tjetër, Inzaghi pritet të hedhë në fushë dyshen Lautaro-Dzeko, të mbështetur nga Brozovic.
