Kryetari i Aleancës për Ardhmërinë e Kosovës (AAK), Ramush Haradinaj, e ka cilësuar vitin 2023 si vitin më të humbur për vendin.
Haradinaj ka theksuar se ky vit ka pasur dështime në çdo segment të jetës e të politikës.
Në postimin e tij në rrjetin social Facebook, ai ka përmendur regresin në pozicionin ndërkombëtar të Kosovës, sanksionet dhe ndëshkimet nga aleatët strategjikë, mungesën e njohjeve dhe investimeve të huaja, si dhe disfatizmin ndaj Serbisë dhe rrezikun për pavarësinë e vitit 2008.
Ai gjithashtu ka theksuar rritjen e çmimeve në artikujt bazë, energjinë, tatimet, dhe artikujt ushqimorë, duke akuzuar dështimet në investimet ekonomike, arsimin, dhe shëndetësinë.
Po ashtu, Haradinaj ka shprehur shqetësimin e tij edhe për çështjet e korruptimit dhe luftën e paskrupullt ndaj gjyqësorit, si dhe largimin masiv të rinisë nga vendi.
“Regres në pozicionin ndërkombëtar të Kosovës; sanksione e ndëshkime nga aleatët strategjikë; asnjë njohje, asnjë investim i huaj; disfatizëm në raport me Serbinë e rrezikim i pavarësisë së Kosovës; rritje enorme e çmimeve në artikujt elementarë, në energji, në tatime, në artikuj bazë ushqimor; dështim në investime e në zhvillim ekonomik; në arsim e në shëndetësi; me pagat më të ulëta në rajon; me afera të pazbardhura korruptive me rezervat shtetërore e tregtimin e energjisë; me luftë të paskrupullt ndaj gjyqësorit, me largimin masiv të rinisë nga vendi, e shumë të tjera”, ka shkruar Haradinaj në Facebook.
Sipas tij, Qeveria me pafytyrësinë e saj dështimet po i paraqet si suksese.
Në përfundim, kryetari i AAK-së ka thirrur për unitet dhe mobilizim për të ndaluar rënimin e shoqërisë dhe shtetit.
Ai ka shtuar se të gjitha këto dështime nuk mund të kalojnë pa ndëshkim.
