Deputetja e Lëvizjes Vetëvendosje, Fitore Pacolli, ka reaguar ashpër ndaj një sërë raportimesh mediatike që pretendojnë se bashkëshorti i saj, Ilir Dalipi, ka përfituar 52 mijë euro përmes organizatës “Defy Them”. Ajo i ka cilësuar këto raportime si “tendencioze, manipuluese dhe me qëllim të qartë politik për të njollosur Qeverinë Kurti dhe për të më sulmuar personalisht”.
Pacolli sqaron se bashkëshorti i saj ka qenë bashkëthemelues i organizatës “Defy Them”, por sipas saj, ai prej vitesh nuk është më pjesë e saj. Organizata në fjalë, që merret me mbështetjen e artistëve të rinj në skenën e muzikës rock dhe alternativës urbane, ka përfituar fonde nga Komuna e Prishtinës dhe Ministria e Kulturës përmes thirrjeve publike dhe duke respektuar të gjitha kriteret ligjore.
“A paskam ndikim edhe në institucionet që nuk i udhëheq LVV?”, pyet me ironi Pacolli, duke theksuar se Komuna e Prishtinës nuk drejtohet nga Lëvizja Vetëvendosje dhe se procedurat për ndarjen e fondeve janë publike dhe të barabarta për të gjithë aplikuesit.
Deputetja thekson se organizata “Defy Them” nuk është pronë personale e askujt, por një hapësirë kolektive që ka përkrahur dhjetëra artistë, ka realizuar koncerte e albume dhe ofron mësime pa pagesë për të rinjtë në fushën e muzikës. Ajo insiston se çdo mbështetje që mund të ketë marrë bashkëshorti i saj është deklaruar në pasurinë e saj publike dhe nuk ka asnjë shkelje ligjore.
“Sot, nuk ka asnjë fakt, asnjë kallëzim penal dhe as edhe një shkresë që më përmend mua në ndonjë procedurë ligjore. E as nuk do të ketë”, deklaron ajo, duke paralajmëruar se për çdo shpifje dhe manipulim të publikuar do të ndjekë rrugën ligjore.
Në fund, Pacolli thotë se kjo është pjesë e një “industrisë së shpifjes me pagesë”, që sipas saj, synon të dëmtojë reputacionin e saj dhe të Qeverisë përmes sensacionalizmit e jo gazetarisë së mirëfilltë.
“Nuk më sulmoni sepse ka shkelje – më sulmoni sepse nuk ka asnjë shkelje”, përmbyll reagimin e saj deputetja e LVV-së.
