Deputetja e Lëvizjes Vetëvendosjes, Shqipe Mehmeti-Selimi, në deklarimet jashtë rendit të ditës ë seancën plenare të së enjtes, ka kërkuar nga Prokuroria që sa më shpejt t’ia ktheje arkivin Zyrës për çështjet e kategorive të dala nga lufta e Ushtrisë Çlirimtare të Kosovës (UÇK), që vepron në kuadër të Zyrës së Kryeministrit.
Ajo ka thënë se në mungesë të këtij arkivi veteranët nuk po mund të pajisen me dokumente.
“Nga viti 2016 ish-kryeprokurori kishte deklaruar se ka nisur hetimi i listave të veteranëve, në vitin 2018 Prokuroria kishte ngritur aktakuzë mbi 900 faqe për 12 zyrtarë, jemi 7 vjet nga fillimi i hetimeve e 5 vjet nga ngritja e aktakuzës. Shumë akuza janë shkëmbyer mes vete midis prokurorëve për këtë rast e i njëjti ende nuk ka marr epilog. Me qëllim të hetimit të listave të veteranëve konfiskoi gjithë arkivin e Zyrës së veteranëve pranë Zyrës së Kryeministrit, si pasojë nga ajo kohë e deri më sot, veteranët, duke përfshirë edhe invalidët e luftës nuk kanë mundësi të pajisen me dokumentet, vërtetimet apo certifikatat për të cilat ata kanë nevoja të shumta”, ka theksuar Mehemti-Selimi.
Sipas saj një veteran për mungesë të një dokumenti të thjeshtë nuk mund t’i gëzojë të drtejtat që i takojnë me ligj.
Deputetja e partisë në pushtet ka thënë se mungesa për kaq kohë të gjatë e arkivave në Zyrën për çështjet e kategorive ta dala nga lufta, ka rezultuar me pamundësi të ushtrimit të të drejtave të veteranëve.
Mehmeti-Selimi ka deklaruar se pa dashur të ndërhyjë në pavarësinë e Prokurorisë, po e pyet se sa vite i duhen për ta bërë një hetim të tillë.
“I bëjmë thirrje asaj që sa më shpejt, Zyrës për çështjet e kategorive të dala nga lufta t’i vihet në dispozicion arkiva e saj, në ndërkohë bëjmë thirrje që Prokuroria të kryejë punën e vet në zbardhjen e cilësdo shkelje që ka quar në fryrjen e listës së veteranëve”, është shprehur Mehmeti-Selimi.
