Deputeti i Lëvizjes Vetëvendosje , Mefail Bajqinovci ka reaguar ndaj dy personave me emrat Agron Guri dhe Sokol Elezaj të cilët në profilet e tyre në facebook publikuan emrin e deputetit Bajqinovci kinse është personi X i cili ka biseduar në telefon me Bojan Dimiq, shefi për Kosovë i Agjencisë serbe të inteligjencës (BIA) ku flasin për dërgimin e Hashim Thaçit dhe Kadri Veselit në Hagë.
Dje portali Paparaci publikoi një audio-incizim ku dëgjohet një bisedë telefonike ku shefi i BIA-s serbe për Kosovë Bojan Dimiq flet me një person i cili sipas portalit është shqiptar nga Kosova.
Ndër te tjera, deputeti Bajqinovci ka kërkuar nga organet e rendit që të fillojnë hetimet ndaj personave të cilët po bëjnë shpifje ndaj tij.
Bajqinovci ka thënë se kjo nuk është hera e parë që është target i sulmeve të tilla , pasiqë edhe më herët të njëjtit kanë deklaruar se vëllau i tij është i punësuar në KEK dhe që Bajqinovci e demanton një gjë të tillë duke thënë se familjari i tij jeton dhe vepron në Kanada.
“Njëherë thanë që vëllau më është punësuar në KEK, kur ai punon dhe jeton në Kanadë. Pastaj thanë që gruaja më është avancuar ndërkohë që ajo ishte në atë pozitë pune si Kryeinfermiere në Patologji QKUK prej 2016, dhe tash këta shpifës përmes llogarive fallco dalin e thonë që jam i përfshirë në shpifjet disa individëve.
Nuk i ndalin gënjeshtrat ndaj meje e sa më shpejtë që demantohen duket se e gjejnë tjetrën. Provojnë të më njollosin mua, Mefail Bajqinovcin, familjar i dëshmorëve dhe luftëtarëve të shquar të çështjes kombëtare, djalit të anëtares së personelit mjekësor të Spitalit Ushtarak të UÇK-së, e cila nën breshërinë e artilerisë serbe, bashkë me të tjerë, lidhi, pastroi e kuroi qindra plage lufte të luftëtarëve të lirisë.
Po, me shpifësit dhe profiterët e 20 vjeçarit nuk çuditem.
Kërkoj nga Policia e Kosovës që të fillojë hetim dhe ta ndriçojë këtë histori turpi.”, ka shkruar Bajqinovci në facebook.
