Deri sa sot mbahet diskutimi në Ambasadën amerikane për Asociacionin, një reagim kundër themelimit të tij e ka bërë deputeti i Kuvendit të Kosovës, Artan Abrashi.
Escobar dhe Chollet në një shkrim autorial dje treguan se çka do të jetë Asociacioni.
Duke iu referuar këtij shkrimi, Abrashi tha se diplomatët amerikanë thanë që Asociacioni do të kryejë funksionet për të cilat të gjitha komunat në Kosovë janë përgjegjëse.
“Pra, në të njëjtin tekst, në njërën anë, na thanë se si Asociacioni nuk do t’ia shtonte Qeverisë së Kosovës një shtresë të re të pushtetit ekzekutiv dhe legjislativ, kurse në anën tjetër na thanë që Asociacioni do të kryejë funksionet e për të cilat janë përgjegjëse komunat. Është evidente se Asociacioni do t’ua marrë kompetencat komunave për t’i ushtruar ato vetë. Kjo është pikërisht një shtresë e re e pushtetit mes qeverisë qendrore dhe asaj komunale< ka shkruar në reagimin e tij Abrashi.
Sot në Ambasadën amerikane në Prishtinë do të mbahet një takim ku do të diskutohet për Asociacionin e komunave me shumicë serbe, ndërsa të ftuar janë zyrtarë nga institucionet, liderë të subjekteve politike, diplomatë dhe anëtarë të shoqërisë civile.
Në këtë takim pritet të dëgjohen propozime nga aktivistë të shoqërisë civile në Kosovë, për atë se si do të duhej të dizajnohet Asociacioni.
Zyra e kryeministrit të Kosovës, Albin Kurti dhe ajo e presidentes Vjosa Osmani kanë konfirmuar pjesëmarrjen në diskutimin për Asociacionin.
Edhe partitë opozitare kanë konfirmuar pjesëmarrjen e tyre në diskutimin e organizuar nga ShBA-ja.
Kohën e fundit faktori ndërkombëtar është duke rritur trysninë mbi Kosovën për zbatimin e marrëveshjes për themelimin e Asociacionit të komunave me shumicë serbe, ndërsa Qeveria e Kosovës vazhdon të kundërshtoj një krijim të tillë që bie ndesh me Kushtetutën e vendit.
Marrëveshja për formimin e Asociacionit të komunave me shumicë serbe në Kosovë është nënshkruar 10 vjet më parë. Por, ajo nuk është zbatuar asnjëherë. Atë e nënshkruan krerët e Qeverisë që udhëhiqej nga koalicioni LDK-PDK.
