Darka e Lamës e cila mbahet tradicionalisht nga Zyra e Presidentit, këtë vit është shënuar bashkë me policët e Kosovës në kampin “Enver Zymeri” në Mitrovicë.
Presidentja e Kosovës, Vjosa Osmani ka thënë se kjo është bërë në shenjë mirënjohjeje, vlerësimi e falënderimi për gra e burra në uniformë “që shërbejnë pa u lodhur për të na bërë të ndihemi të sigurt”.
“Në prani edhe të familjeve të policëve që kanë rënë në detyrë, përfshirë familjen e heroit Afrim Bunjaku, shprehëm mirënjohjen më të thellë të të gjithë qytetarëve të Republikës për ata që dhanë jetën në mbrojtje të çdo pëllëmbe të territorit të vendit tonë”, ka shkruar ajo në Facebook.
Në vitin 2002, Darka e Lamës qe rivitalizuar edhe në nivel institucional nga presidenti Ibrahim Rugova. Rugova e pati shpallur Darkën e Lamës si festë të falënderimit dhe e pati promovuar si festë shtetërore të Republikës së Kosovës. Rugova pati ftuar të afërm politikë, bashkëpunëtorë institucionalë e shtetërorë dhe miq ndërkombëtarë për të dhënë darkën dhe falënderuar Zotin dhe tokën e Kosovës për të mirat që kishte sjellë atë mot. Edhe sot, Zyra e Presidencës organizon Darkën e Lamës, ndonëse nuk është shndërruar zyrtarisht në festë shtetërore.
