Ballkani po vazhdon me formën e lartë në garat evropiane, teksa sonte e fitoi përballjen e parë ndaj BATE Borisovit, në kuadër të fazës së “Play-Off”-it në Ligën e Konferencës.
Skuadra e drejtuar nga Ilir Daja triumfoi me rezultatin 4:1. Ndeshja u zhvillua në stadiumin “Fadil Vokrri”.
Pas ndeshjes, u deklarua Ilir Daja, i cili tha se kjo fitore shkon për Lindon Emërllahun.
“Kjo fitore i shkon Lindon Emërllahut, sepse dje është rikuperuar dhe i urojmë rikthim sa më të shpejtë. Kjo fitore shkon për tifozët e Suharekës, tifozët kosovarë – kjo fitore i shkon për këta djemë që nuk dorëzohen kurrë”, tha fillimisht Daja.
“Kemi dominuar kundërshtarin, me raste, me lojë, me gola. Kemi humbur raste, por kemi shënuar. Rezultati 4-1 në ndeshjen e parë ndaj një kundërshtari me kogja eksperiencë – sigurisht se është fitore bindëse për çunat. Sukseset e Ballkanit janë sukseset e Kosovës. Kemi shtatë ndeshje, gjashtë fitore, një humbje, unë nuk merrem, por le të merren specialistët me një humbje se nuk po i zë gjumi në darkë”, përfundoi ai.
