Gjatë dëshmisë së tij në Hagë, sot (e hëne), gjenerali Wesley Clark u pyet për rolin e Rexhep Selimit dhe Kadri Veselit në periudhën e luftës.
Clark deklaroi se nuk ka dijeni për veprimtarinë e tyre konkrete, por konfirmoi se emrat e tyre i kishte dëgjuar më herët.
“Jo, por i kam parë emrat e tyre më përpara”, tha ai.
Clark u pyet gjithashtu për Azem Sylën dhe Sokol Bashotën, por tha se nuk ka njohuri as për ta.
Dëshmitari theksoi se është takuar tre herë me mbrojtjen e Hashim Thaçit për intervistimin dhe pranoi se nuk e di saktësisht se për çfarë krimesh akuzohen katër ish-krerët e UÇK-së.
Duke folur për një incident gjatë fushatës ajrore të NATO-s, Clark përshkroi një rast ku u godit një objekt i identifikuar gabimisht si bazë serbe, por që rezultoi të ishte pikë grumbullimi e kontrolluar nga ushtria ose MUP-i, ku ndodheshin civilë shqiptarë.
“Besoj që vramë rreth 80 civilë të pafajshëm”, tha ai, duke theksuar se goditja ndodhi si pasojë e informacionit të gabuar të ofruar nga terreni.
Clark pritet ta vazhdojë dëshminë edhe nesër.
