Edicioni i radhës i Chopin Piano Fest është hapur zyrtarisht në Prishtinë me pjesëmarrjen e Kryeministrit të Republikës së Kosovës, Albin Kurti. Ky festival, tashmë i konsoliduar në kalendarin kulturor të vendit dhe rajonit, përfaqëson më shumë se një seri koncertesh – ai është një platformë dinamike që ndërthur artin, edukimin, trashëgiminë dhe diplomacinë kulturore.
Në fjalën e tij, Kryeministri Kurti theksoi rëndësinë që festivale të tilla kanë për afirmimin ndërkombëtar të kulturës kosovare dhe për përkrahjen e sektorit të pavarur artistik. Ai shprehu mirënjohje të veçantë për profesoreshat Lejla Pula dhe Besa Luzha, të cilat, së bashku me ekipin organizativ dhe mbështetës vendorë e ndërkombëtarë, kanë ndërtuar një ekosistem të gjallë kulturor që i përket të gjithëve.
“Në këtë vit të reformave ligjore në fushën e kulturës, ne si Qeveri riafirmojmë përkushtimin tonë për të krijuar kushte të reja për zhvillimin e kulturës, në veçanti për festivale që janë pasuri kombëtare dhe pasqyrë e identitetit tonë në botë,” deklaroi Kurti.
Chopin Piano Fest vazhdon të jetë një urë lidhëse mes skenës së pavarur muzikore të Kosovës dhe rrjeteve kulturore ndërkombëtare. Me një program të pasur koncertesh dhe ngjarjesh artistike, festivali mbështet talentët e rinj, dokumenton krijimtarinë muzikore dhe nxit bashkëpunimin përtej kufijve.
