Në tubimin përmbyllës të fushatës në Prishtinë, kandidati i Lëvizjes Vetëvendosje për kryetar të kryeqytetit, Hajrulla Çeku, ka akuzuar partitë opozitare se janë bashkuar për ta mbështetur kandidatin e Lidhjes Demokratike të Kosovës, Përparim Ramën, në balotazhin e së dielës, raporton KosovaNews.
“Janë sërish bashkë jo për Prishtinën, por për veten e tyre. Ata nuk ndahen kurrë për interesa. Janë bashkë në prapaskenë, në tenderë, në poste e tash bashkë kundër ndryshimit – por s’do të lejojmë”, ka deklaruar Çeku para mbështetësve të Vetëvendosjes.
Në të njëjtin tubim, kryetari i Lëvizjes Vetëvendosje, Albin Kurti, ka kritikuar ashpër qeverisjen e deritanishme të Prishtinës, duke e quajtur periudhën e udhëheqjes së Përparim Ramës “katër vjet të humbura”.
“Punët e nisura nuk janë përfunduar, premtimet e dhëna nuk janë parë e qytetari është lodhur nga justifikimet e dobëta dhe ankesat e palogjikshme. Ka pasur mundësi të mëdha, fonde të mjaftueshme e vëmendje kombëtare, por gjithçka është humbur mes mungesës së planit, tepricës së arrogancës, diletantizmit kronik dhe orekseve financiare të drejtuesve të saj”, tha Kurti.
Balotazhi për kryetar të Prishtinës zhvillohet të dielën, ku përballen kandidati i Lëvizjes Vetëvendosje, Hajrulla Çeku, dhe ai i Lidhjes Demokratike të Kosovës, Përparim Rama.
