Pasi Kuvendi i Kosovës sot e ka miratuar në parim Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, ministrja e Drejtësisë, Albulena Haxhiu theksoi se rekomandimet e Komisionit të Venecias do të adresohen të gjitha pranë grupit punues të Komisionit për Legjislacion.
Haxhiu në një postim në Facebook ka falënderuar deputetët që votuan projektligjin.
“Falënderoj deputetët e Kuvendit për miratimin në parim të Projektligjit për Byronë Shtetërore për verifikimin dhe konfiskimin e pasurisë së pajustifikueshme. Rekomandimet e Komisionit të Venecias do të adresohen të gjitha pranë grupit punues të Komisionit për Legjislacion”, shkruan Haxhiu.
Gjatë seancës kryeministri Albin Kurti ka thënë se është e rëndësishme që të takohen si subjekte politike dhe të gjejnë një zgjidhje për këtë projektligj.
“Është e domosdoshme që të kemi sa më shumë konsultime edhe si subjekte politike. Duhet ta bëjmë ndarjen e qartë të gjërave që nuk janë të njëjta. Byroja dhe vettingu nuk janë e njëjta gjë nuk është mire që të fusim gjithçka në një thes kur nuk e kanë vendin aty”, ka thënë ai.
Opozita nuk e ka mbështetur Projektligjin për byronë shtetërore për verifikimin dhe konfiskimin e pasurisë së pajustifikueshme, ndonëse kjo pikë ka kaluar me mbështetjen e deputetëve të pushtetit me 58 vota për, 3 abstenime dhe asnjë kundër.
