Ka shkuar në 36 numri i të vdekurve nga përplasja e dy trenave në afërsi të qytetit grek Larissa të martën mbrëma, ndërsa janë të lënduar 85 persona, raporton mediumi grek “Kathimerini”.
Ekziston frika se numri i të vdekurve do të rritet më tepër, pasi ka ende persona të ngujuar në vagonat e parë të trenit të pasagjerëve, ku edhe po zhvillohen operacionet e kërkim-shpëthimit.
Një tren i pasagjerëve me afro 350 udhëtarë u përplas me një tren të mallrave në mënyrë frontale.
Treni i pasagjerëve ishte nisur nga Athina për në Selanik. Ende nuk po dihen rrethanat e aksidentit.
Ndërkaq nuk dihet ende nëse ka shqiptarë mes viktimave dhe të plagosurve nga përplasja tragjike e dy trenave në Greqi.
Kështu u shpreh kreu i komunitetit shqiptar në Greqi, Luan Zyka, sipas të cilit këtë njoftim e bën policia.
Ai tha se nga informacionet paraprake mësohet se në tren ishin shumë studentë që ktheheshin në Selanik.
“Nuk dihet nëse ka shqiptarë apo jo mes viktimave. Jemi interesuar me spitalin e Larisës se atje kanë shkuar viktimat dhe të plagosurit janë 32 viktima 85 të plagosur, 58 persona janë ende në spital. Ajo që na thuhet është që shumica kanë qenë studentë që ktheheshin në Selanik. Akoma nuk dimë nëse ka shqiptarë, kam telefonuar në spitalin e Larisës se kjo del nga policia dhe spitali nuk na jep të dhëna”, u shpreh ai.
Zyka thekson se aksidenti ka ndodhur për gabim njerëzor për shkak të mungesës së sinjalistikës.
“Gabim njerëzor dhe mungesë e sinjalistikës me trenat. Greqia ka bërë një modernizim me linjat e trenave dhe firma italiane nuk e ribën, por një linjë kaq moderne të mos funksionojë sinjalistika. Dy vagonat e parë janë shkatërruar komplet se janë përplasur tren udhëtarësh me trena mallrash thuhet që vagoni i parë është ngritur në ajër”.
