Policia italiane ka sekuestruar 4.3 tonë kokainë, me vlerë 240 milionë euro, duke goditur kështu kartelin kolumbian të drogës “Clan del Golfo”, kanë bërë të ditur hulumtuesit të martën.
Sipas policisë italiane, ky është një prej sekuestrimeve më të mëdha të drogës në Evropë dhe ka ardhur si rezultat i një hetimi ndërkombëtar, që rezultoi me lëshimin e urdhërarresteve për 38 persona në gjashtë shtete: Itali, Slloveni, Kroaci, Bullgari, Holandë dhe Kolumbi, njoftoi Reuters të martën.
Hetimi zgjati më shumë se një vit me përfshirjen edhe të organeve të Kolumbisë dhe SHBA-së. Përveç kokainës, policia po ashtu ka konfiskuar 1.85 milionë euro kesh.
Autoritetet kolumbiane kanë thënë nëntorin e kaluar se janë të fokusuar në thyerjen e klanit “Clan del Golfo”, rrjeti i të cilëve shtrihet në 28 shtete në të gjithë botën, pas kapjes së liderit të grupit, Dairo Antonio Usuga, i njohur si “Otoniel”, në tetor të vitit 2021.
