Një bombë e pashpërthyer e Luftës së Dytë Botërore u transportua të premten përgjatë portit jugperëndimor të qytetit anglez Plymouth, nga një autokolonë ushtarake dhe u hodh në det, ku u shpërthye nga zhytësit e marinës. Kjo ka shkaktuar një nga evakuimet më të mëdha në Mbretërinë e Bashkuar që nga lufta, raporton Associated Press.
Policia ka thënë se bomba, e cila u gjet në një oborr rezidencial të martën, u dërgua në tragetin “Torpoint” për t’u hedhur në det. Bomba besohet se peshon rreth 500 kilogramë, sipas Ministrisë së Mbrojtjes britanike.
Më shumë se 3 mijë njerëz janë evakuuar nga shtëpitë.
Vendimi për ta transportuar bombën në det është marrë pas vlerësimit nga ekspertët e bombave, të cilët dolën në përfundim se do kishte rrezik të madh për shkatërrim nëse do të shpërthehej aty ku u gjet.
“Jemi lajmëruar nga ushtria se operacioni ka qenë i suksesshëm dhe bomba është larguar”, ka thënë Këshilli i qytetit Plymouth. “Tani mund të fillojmë të kthejmë njerëzit e evakuuar nëpër shtëpitë e tyre”.
Giles Perritti, ndihmës-shefi ekzekutiv i Këshillit të qytetit të Plymouthit, ka thënë se më shumë se 1 mijë oficerë janë përfshirë në këtë operacion për të larguar bombën në mënyrë të sigurt.
Rreth 10% e bombave gjermane që janë lëshuar gjatë Luftës së Dytë Botërore në Britani nuk kanë shpërthyer, duke lënë shumë qytete të mbushura me eksplozivë të rrezikshëm.
