Për shkak të vizitave të personaliteteve nga vende të ndryshme për disa ditë në Kosovë, disa rrugë mund të bllokohen përkohësisht.
Policia e Kosovës ka njoftuar se të premten presidenti i Maltës, George Vella, me delegacion shoqërues do të jetë në vizitë disaditore. Ai do të përcillet me eskortë dhe për shkak të përcjelljes do të ketë ndërprerje të përkohshme të qarkullimit të trafikut në kryeqytet.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore, kryesisht në kryeqytet ku pritet të kalojë eskorta, si dhe në lokacione të caktuara ku parashihen të realizohen aktivitete”, thuhet në njoftimin e PK-së.
Po ashtu, në lokacione të tjera jashtë Prishtinë ku parashihen aktivitetet do të angazhohen policët.
Ndërkohë, që presidentja e vendit, Vjosa Osmani, organizon Forumin e grave për paqe dhe siguri nga 21 deri më 23 tetor, parashihen planifikime operacionale nga policia.
“Përgjatë këtyre dy-tri ditëve, mund të ketë qarkullim më të intensifikuar të pjesëmarrësve dhe automjeteve në lokacione të caktuara dhe njoftojmë opinionin se mund të ketë bllokim të përkohshëm të disa rrugëve, prandaj për të mundësuar qarkullim dhe riorientim në trafik do të angazhohen zyrtarë policorë të njësiteve relevante”, thuhet në njoftim.
