Pëderisa në vendin tonë sot u mbajtën takime, diskutime dhe përplasje të ashpra për konstituimin e Kuvendit, i cili dështoi për herë të 16-të, Stambolli, ishte mirëpritëse e negociatave të para direkte mes Rusisë dhe Ukrainës që prej fillimit të luftës në vitin 2022.
Ky samit, i cili ishte planifikuar të mbahej sot, është shtyrë për nesër, më 16 maj, me synimin për të gjetur një zgjidhje të qëndrueshme për konfliktin
Takimi pritet të jetë negociata e parë direkte mes dy vendeve që nga fillimi i luftës në vitin 2022 ku do të marrin pjesë delegacione nga Rusia, Ukraina, Turqia dhe Shtetet e Bashkuara të Amerikës, nën ndërmjetësimin e Ankarasë, duke synuar një zgjidhje të qëndrueshme për konfliktin, shkruan KosovaNews
Përbërja e delegacioneve: Pa liderët kryesorë, por me mandat të plotë
Nga Rusia do të jetë Vladimir Medinsky, këshilltar i lartë i presidentit Putin, së bashku me zëvendësministrin e Jashtëm Mikhail Galuzin, zëvendësministrin e Mbrojtjes Alexander Fomin dhe gjeneralin Igor Kostyukov.
Ndërkohë, Medinsky ka theksuar se kanë mandat të plotë për të negociuar dhe sipas tij, synojnë të vazhdojnë dialogun e ndërprerë që nga samiti i vitit 2022.
Në anën ukrainase, ministri i Mbrojtjes Rustem Umerov do ta përfaqësojë vendin, pasi presidenti Volodymyr Zelensky vendosi të mos marrë pjesë personalisht.
Pas një vizite në Ankara dhe një takimi me presidentin turk Erdoğan, Zelensky kritikoi përbërjen e delegacionit rus si të papërfaqësueshëm për vendimmarrje dhe paralajmëroi se bisedimet pa lidership të vërtetë nga Kremlini janë të destinuara të dështojnë.
Angazhimi ndërkombëtar: SHBA dhe Turqia në rolin e ndërmjetësit
Në anën tjetër, sekretari amerikan i Shtetit, Marco Rubio, konfirmoi pjesëmarrjen në samit ku tha se do të zhvillojë takime me ministrin e Jashtëm turk Hakan Fidan dhe delegacionin ukrainas.
Ai shprehu skepticizëm për përbërjen e delegacionit rus dhe nënvizoi nevojën për përfshirjen e liderëve kryesorë për të arritur përparim real.
Ndërkaq, Presidenti turk Rexhep Taip Erdogan, u shpreh se Turqia është e gatshme të organizojë një takim ballë për ballë mes Putin dhe Zelenskyt “kurdo që ata të jenë të gatshëm”, duke theksuar kështu rëndësinë e armëpushimit të menjëhershëm dhe nisjes së negociatave gjithëpërfshirëse për paqe.
Zhvillimet e ditës: Largimi i Zelenskyt, mbërritja e delegacionit rus dhe mesazhet e Moskës
Në zhvillimet e fundit, Zelensky përfundoi vizitën e tij në Ankara dhe konfirmoi se nuk do të jetë vetë pjesë e samitit.
Ai përsëriti angazhimin e Ukrainës për paqe, megjithëse shprehu skepticizëm për përbërjen e delegacionit rus.
Delegacioni rus mbërriti në Stamboll duke shprehur gatishmëri për bisedime serioze.
Megjithatë, mungesa e presidentit Vladimir Putin, po shihet si një sinjal i mungesës së gatishmërisë për kompromis nga Moska.
Pritshmërite janë të medha por me rezervë
Edhe pse mungesa e liderëve kryesorë të dy vendeve vë në pikëpyetje efikasitetin e negociatave, fakti që katër palë – Rusia, Ukraina, SHBA dhe Turqia – do të ulen së bashku në një tryezë bisedimesh është një hap pozitiv.
Nga ana tjetër, komuniteti ndërkombëtar është me sytë nga Stambolli, duke pritur që këto bisedime të sjellin një hap të rëndësishëm drejt përfundimit të luftës dhe rikthimit të paqes në Evropë. /KosovaNews/
