Kryetari i Shoqatës së Naftëtarëve të Kosovës, Fadil Berjani, ka folur për zhvillimet e fundit në tregun global të naftës dhe ndikimin e tyre në çmimet vendore.
Sipas tij, megjithëse në bursat ndërkombëtare po vërehet rritje e ndjeshme e çmimit të naftës, tregu kosovar mbetet stabil dhe me çmimet më të ulëta në rajon.
Berjani tha se indeksi “Crude Brent” është rritur mbi 5 për qind, duke u tregtuar rreth 65.85 dollarë për fuçi.
“Kjo rritje erdhi pas sanksioneve të reja amerikane ndaj kompanive kryesore ruse të naftës, që ngritën shqetësime për një furnizim më të kufizuar në nivel global. Në të njëjtën kohë, rezervat e naftës në SHBA ranë në mënyrë të papritur. Kombinimi i këtyre faktorëve ka ringjallur frikën në tregjet e energjisë dhe ka treguar se sa shpejt zhvillimet gjeopolitike ndikojnë në çmimet e naftës,” ka theksuar ai.
Sa i përket çmimeve aktuale në Kosovë, Berjani ka bërë të ditur se:
- Dizel: 1.17€ deri 1.26€
- Benzinë: 1.18€ deri 1.27€
Në krahasim me rajonin, Kosova vazhdon të ketë çmimet më të lira të derivateve:
- Shqipëri: Dizel 1.98€, Benzinë 1.99€
- Serbi: Dizel 1.88€, Benzinë 1.99€
“Qytetarët tanë janë duke u furnizuar me çmimet më të lira në rajon,” ka deklaruar Berjani.
Ai shtoi se, ndonëse në tregun botëror po vërehet rritje ekstreme e çmimit të naftës, në Kosovë çmimet mbeten stabile.
“Në tregun botëror nafta është duke u rritur në mënyrë ekstreme, por te ne në Kosovë çmimi është stabil. Faktorët kryesorë janë embargoja e ish-presidentit Trump ndaj kompanive më të mëdha ruse. Fatkeqësisht çmimi nuk është duke rënë në tregjet ndërkombëtare, por është në rritje, ndërsa në Kosovë mbetet i pandryshuar,” ka shtuar ai.
Sa i përket ditëve në vijim, Berjani nuk parashikon ndryshime të menjëhershme në tregun kosovar:
“Çfarë çmime do të kemi në ditët në vijim, s’mund ta paragjykojmë, sepse në bursë po ka rritje ekstreme të naftës, por te ne nuk ka lëvizje,” ka sqaruar ai.
Në fund, ai ka njoftuar se çmimi i furnizimit aktual është rreth 1.12 euro për litër dizel, ndërsa me pakicë shitet 1.17 euro, duke theksuar edhe njëherë se Kosova vazhdon të ketë çmimet më të ulëta të derivateve në rajon./IndeksOnline/
