Komisioni Evropian ka deklaruar se nuk do të pranojë asnjë rritje të tarifave amerikane ndaj mallrave evropiane, pas vendimit të Gjykatës Supreme të SHBA-së për të rrëzuar tarifat globale të vendosura nga presidenti Donald Trump.
Brukseli ka reaguar pasi presidenti amerikan më 20 shkurt shpalli tarifa të përkohshme të përgjithshme prej 10%, të cilat një ditë më vonë, më 21 shkurt, i rriti në 15%. Trump këtë vendim e mori menjëherë pasi Supremja ia rrëzoi tarifat që ishin në fuqi më herët, duke konstatuar se ishin joligjore.
Në një deklaratë të publikuar të dielën, Komisioni – që negocion politikën tregtare në emër të 27 shteteve anëtare të BE-së – kërkoi nga Washingtoni “qartësi të plotë” mbi hapat që synon të ndërmarrë pas vendimit të gjykatës.
“Situata aktuale nuk është e favorshme për të ofruar tregti dhe investime transatlantike të drejta, të balancuara dhe reciprokisht përfituese, siç është rënë dakord nga të dyja palët. Marrëveshja është marrëveshje”, theksohet në reagim.
Qëndrimi i ri i Brukselit është dukshëm më i ashpër se reagimi fillestar i së premtes, kur Komisioni u shpreh se po studionte vendimin e Gjykatës Supreme dhe po mbante kontakte me administratën amerikane.
Marrëveshja tregtare BE–SHBA e arritur vitin e kaluar parashikonte një tarifë 15% për shumicën e mallrave evropiane që hyjnë në tregun amerikan, me përjashtime për produkte të caktuara si avionët dhe pjesët e këmbimit, të cilat përfitonin tarifa zero. Po ashtu, BE-ja hoqi detyrimet doganore për shumë produkte amerikane dhe tërhoqi kërcënimin për masa hakmarrëse.
Megjithatë, mbetet e paqartë nëse tarifat e reja 15% të shpallura nga Trumpi e zëvendësojnë marrëveshjen ekzistuese
