Bashkimi Evropian, Egjipti dhe Izraeli kanë nënshkruar sot një Memorandum Mirëkuptimi trepalësh, për eksportin e gazit natyror në vendet evropiane.
Marrëveshja, e cila u nënshkrua në Kajro, do të ndihmojë në reduktimin e varësisë energjetike të bllokut nga Rusia.
“Çfarë momenti i veçantë. Të tre palët synojnë të ndërtojnë infrastrukturë të përshtatshme për burimet e rinovueshme – energjinë e së ardhmes”, tha presidentja e Komisionit Evropian, Ursula von der Leyen.
Sipas memorandumit, të tre palët do të punojnë së bashku për të siguruar një furnizim të qëndrueshëm të gazit natyror në tregun evropian.
BE-ja do të ndihmojë gjithashtu Egjiptin dhe Izraelin të rrisin prodhimin dhe eksplorimin e gazit në ujërat e tyre territoriale përkatëse.
Vitin e kaluar, BE importoi rreth 40 për qind të gazit të saj nga Rusia. Pushtimi i Ukrainës shkaktoi një ndryshim të mprehtë në politikën e BE-së që nënkuptonte kërkimin e burimeve alternative të energjisë.
Ministri egjiptian i naftës, Tarek el-Molla, e përshkroi marrëveshjen si një moment historik, të rëndësishëm për bashkëpunimin mes Egjiptit, Izraelit dhe BE-së, raporton DW, transmeton Klankosova.tv.
Kryeministri i Izraelit, Naftali Bennett, gjithashtu përshëndeti marrëveshjen në një postim në ‘Twitter’ duke thënë: “Për herë të parë në histori, Izraeli do të bashkëpunojë me Egjiptin dhe do të eksportojë gaz natyror bardh e kaltër në Bashkimin Evropian”.
Gjatë viteve të fundit ka pasur një përmirësim gradual të marrëdhënieve mes Egjiptit dhe Izraelit.
