Kryetari i Partisë Demokratike të Kosovës (PDK), Memli Krasniqi, ka thënë se nuk mori siguri se Qeveria e Kosovës e di se në çfarë drejtimesh do të shkojë për ta mbajtur nën kontroll situatën në veri.
Krasniqi ka thënë para mediave pas takimit që ka pasur me kryeministrin, Albin Kurti, se Qeveria do ta ketë mbështetjen e PDK-së për ushtrimin e sovranitetit në katër komunat veriore.
“Nuk mund të them se dola me ndonjë siguri të madhe se qeveria e di se në çfarë drejtimesh duhet të shkojë për ta mbajtur situatën nën kontroll. Shpreha qëndrimin e PDK-së që në këtë moment Kosovës i duhen veprime të përgjegjshme. Sa i përket vazhdimësisë së ushtrimit të sovranitetit në katër komunat veriore, qeveria duhet t’i ndërmarrë veprimet që i takojnë dhe për këtë do ta ketë përkrahjen e PDK-së në çfarëdo mundësie që kemi”, ka thënë Krasniqi.
Sipas tij, Kosova ka hyrë në një situatë e cila ka mundur të shmanget nëse do të kishte koordinim me aleatët kryesorë.
“S’kemi përgjigje këto kanë qenë disa nga negociatat për gatishmërinë për të diskutuar dhe mundësinë për t’ju ndihmuat Sot dalë nga ky takim jo shumë i sigurt që kryeministri dhe Qeveria e dinë se në çfarë rruge po shkojnë për të ruajtur integritetin e Kosovës”, tha Krasniqi.
