Ka shumë raste të dhunës që prindërit ushtrojnë ndaj fëmijëve të tyre në hapësira publike.
Një ngjarje e tillë ka ndodhur edhe mbrëmë, në sheshin e Drenasit, ku u arrestua një 41-vjeçar, raporton KosovaNews.
I dyshuari Xh.D., në orët e mbrëmjes, në sheshin e qytetit ka ushtruar dhunë ndaj vajzës së tij 13-vjeçare, të cilën e ka goditur me grushte e shqelma.
Ngjarja dyshohet se kishte ndodhur për shkak të një mosmarrëveshjeje që babai kishte pasur me fëmijën, me ç’rast e ka sulmuar brutalisht, duke i shkaktuar lëndime trupore.
Kjo ka bërë që dikush ta njoftojë Policinë për të intervenuar, me ç’rast një njësi e ka shoqëruar të dyshuarin në stacion policor, për t’u deklaruar në lidhje me rastin.
Gjatë intervistimit, i dyshuari e ka pranuar se e ka rrahur vajzën e tij. Me vendim të Prokurorit i dyshuari është liruar, për t’u hetuar në procedurë të rregullt për veprën penale “dhunë në familje”.
