Nën patronazhin e kryeministrit, Albin Kurti dhe me organizimin e Ministrisë së Punëve të Jashtme dhe Diasporës, sot ka filluar punimet Forumi Ekonomik në mes të Republikës së Kosovës dhe Republikës së Kroacisë.
Pos Kurtit, në forum po marrin pjesë ministra dhe zëvendësministra të Qeverisë së Kosovës dhe Qeverisë së Kroacisë.
Kryeministri Albin Kurti tha se duke marrë për bazë raportet e mira të shteteve dhe shkëmbimin tregtar e ekonomik që gjithnjë po shënon rritje, duhet që marrëdhëniet të rriten edhe më tej.
Ai tha se ekspertet e Kosovës për në Kroaci janë trefishuar, si edhe importet nga ky vend janë dyfishuar, ndërsa janë rreth 160 kompani kroate që po veprojnë në Kosovë.
“Eksportet tona me Kroacinë janë trefishuar ndërsa importet nga Kroacia janë dyfishuar. Për momentin janë më shumë se 160 kompani kroate që po shërbejnë në Kosovë me rreth 650 punëtorë. Jam i sigurt që këto shifra veç sa do të rriten në vijim”.
Ai tha se po ashtu është i kënaqur për nisjen e fluturimeve direkte nga Zagrebi në Prishtinë, të cilat zgjerojmë infrastrukturën e transportit ku projekte të reja do të vijnë me autostrada dhe hekurudha në çdo drejtim të vendit me rajonin.
“Po ashtu po planifikojmë më shumë se 80 projekte publike mjedisore dhe infrastrukturore me vlerë prej më shumë se 3 miliardë euro”, tha Kurti.
Në këtë Forum, po ashtu do të marrin pjesë edhe përfaqësues të universiteteve dhe institucioneve tjera relevante si dhe përfaqësues të komuniteteve të biznesit nga të dyja vendet.
Në kuadër të forumit gjithashtu do të nënshkruhet një Marrëveshje Bashkëpunimi mes dy shteteve në fushën e turizmit.
Ministria e Punëve të Jashtme e Kosovës në një njoftim të saj thekson se Republika e Kosovës mbetet e përkushtuar në forcimin e bashkëpunimit dhe marrëdhënieve të shkëlqyera që ka me Republikën e Kroacisë, si mike dhe partnere strategjike e vendit tonë.
