Asamblisti nga radhët e Lëvizjes Vetëvendosje në Prizren, Selman Sokoli, ka kërkuar nga kryetari i kësaj komune, Shaqir Totaj të jetë më transparent rreth vizitave të tij zyrtare, pasi ky i fundit me arsyetimin se ndodhet në Greqi, nuk mori pjesë në një seancë të rëndësishme të Kuvendit Komunal në të cilën do të votohej një propozim i tij.
Sipas Sokolit, ai nuk kishte njoftim për agjendën e tij në Greqi dhe pas kërkesës që të jetë transparent përmes qasjes në dokumente publike, përgjigjja që morën nga Totajt ishte vetëm shuma e shtesave që i ka marrë si parapagim për vizitën eventuale në Greqi.
Ai tha se Totaj duhet t’iu shpjegoj qytetarëve për gjërat, si: kohën e vizitës dhe qëndrimit në Greqi, aktivitetin që e ka zhvilluar atje ose takimet që i ka pasur, kush është organizatori që e ka ftuar, ftesën e organizatorit dhe arsyen e ftesës, shpenzimet e udhëtimit dhe qëndrimit atje etj.
“Nëse vërtetë ka qenë atje, pse nuk i ka ndarë të dhënat me publikun, sepse taksapaguesit prizrenas kanë të drejtë të dijnë se si dhe pse po shpenzohen taksat e tyre”, ka thënë Sokoli.