Ad image

Në Fakultetin e Edukimit në Prishtinë mbahet Konferenca Ndërkombëtare e Hulumtimeve në Arsim

Kosova News
Kosova News 18:31 -10/06/2022

Në Fakultetin e Edukimit të Universitetit të Prishtinës “Hasan Prishtina”, Instituti për Hulumtime dhe Zhvillim në Arsim ka organizuar Konferencën Ndërkombëtare të Hulumtimeve në Arsim- KICER 2022.

Referuar faqes zyrtare të Fakultetit të Edukimit, thuhet se konferenca organizohet me qëllim që të ofrohen njohje dhe praktika të reja shkencore , me synim përmirësimin  e cilësisë së arsimit në Kosovë dhe një nga temat që do të trajtohet është “Zhvillimi i qasjes së bazuar në dëshmi në edukim, në një kontekst në ndryshim”. Në hapje të konferencës e pranishme ishte edhe ministrja e Arsimit, Shkencës, Teknologjisë dhe Inovacionit, Arbërie Nagavci.

Ministrja Nagavci në fjalën e saj përgëzoi Universitetin e Prishtinës dhe Fakultetin e Edukimit për këtë nismë dhe uroi që kjo konferencë të prodhojë rezultate që do t’i shërbejnë vetë Fakultetit dhe Ministrisë së Arsimit, si hartuese e politikave në arsim.

“Kërkimi në fushën e arsimit është i nevojshëm për të pasuruar rezultatet shkencore dhe për të përmirësuar praktikat mësimore.

Hulumtimet në arsim udhëzojnë reformën në këtë fushë dhe kontribuojnë shumë në ndryshimin e shoqërisë, në mënyrë që të avancohet niveli i punës shkencore dhe akademike në universitet. Tashmë është hartuar Plani Strategjik për Arsimin 2022/26, ku zhvillimi i arsimit të lartë dhe shkencës është një nga prioritetet e kësaj strategjie, e që është në harmoni edhe me programin qeveritar.

Fakulteti i Edukimit krijon kuadro për sistemin tonë shkollor dhe këtë konferencë e sheh si përpjekje serioze për të avancuar praktikat e përgatitjes së mësimdhënësve cilësorë”, ka theksuar ministrja Nagavci.

Rektori i Universitetit të Prishtinës, Naser Sahiti, në fjalën e saj tha se tashmë është dëshmuar se shumë shtete pasi kanë arritur të zhvillojnë sistemin arsimor kanë zhvilluar edhe fushat tjera, ndërsa shtoi se rëndësia e kësaj konference është në funksion të zhvillimit të arsimit.

Konferenca do të zgjasë dy ditë dhe të me kumtesat e tyre shkencore pritet të prezantojnë të gjeturat një numër i madh i pjesëmarrësve. Dita e dytë e konferencës do të zhvillojë punimet online./KosovaNews/  

Shpërndaje