Duke i kundërshuar grevat e mësimdhënësve, Ramadan Beqiri, profesori i lëndës së Fizikës në shkollën fillore dhe të mesme të ulët “Xhavit Ahmeti” në Prishtinë, ka vendosor që të martën të mbajë mësim me 250 nxënësit e tij në këtë shkollë.
Në një prononcim të dhënë për KosovaNews, Beqiri ka thënë se mësimdhënësit nuk e kanë gjendjen e mirë financiare, por, sipas tij, një pagesë aq e ulët që po e kërkon sindikata nuk duhet të jetë arsyeja që mësimdhënësit të mos jenë me nxënësit.
“Kam bërë fetesë që nxënësit nesër të vijnë në shkollë dhe unë t’ua ofroj mësimin atyre. Mësimdhënësit nuk e kanë gjendjen e mirë financiare me këto paga, por Qeveria ka ofruar një opsion jashtëzakonisht të mirë, besoj se këtë do ta rrisë edhe më tepër, mirëpo një pagesë aq e ulët, që e kërkon sindikata, nuk duhet të jetë arsyeja që ne të mos jemi me nxënësit.”, ka thënë Beqiri.
Duke u bërë thirrje kolegëve të tij që ta fillojnë mësimin, Beqiri ka thënë se ku mbetet dinjiteti i mësimdhënësve nëse nxënësit i tubojnë 50 euro, secili nga 20 centë, dhe na ofrojnë, duke na thënë se merri paratë e na mësoni.
“E kam bërë një llogaritje, se janë 250 nxënës, të cilëve do t’u jap mësim në lëndën e Fizikës, çka do të bëjmë nëse ata i tubojnë 50 euro, secili nga 20 centë, dhe na ofrojnë duke na thënë se merri paratë e na mësoni. Ku mbetet dinjiteti i sindikatës e i mësimdhënësit. Prandaj, unë i fotj nxënësit e kësaj shkolle që të jenë prezent, sepse unë do ta mbaj mësimin në lëndën e Fizikës bashkë me ta”, u shpreh ai për KosovaNews.
Duke i kujtuar vështirësitë e mësimdhënies pa pagesë në vitet e 90-ta, profesori Beqiri i ka bërë thirrje SBASHK-ut që t’i ndërpresë thirrjet e bojkotimit të mësimit.
“I bëj ftesë SBASHK-ut që t’i lërë thirrjet e bojkotimit të mësimit, sepse nuk na çojnë askund. Ne duhet të punojmë me nxënës, sepse unë jam një prej atyre që kam filluar punën në vitet e 90-ta, pa asnjë pagë, dhe kemi punuar. Fatmirësisht, tash kemi paga, nuk janë të mira, por besoj që kjo qeveri do t’i përmbushë kërkesat tona në mandatin që e ka”, ka thënë ai.
Ndryshe, viti i ri shkollor, që do të duhej të fillonte më 1 shtaror, nuk ka filluar ende për shkak të grevave të organizuara nga Sindikata e Bashkuar e Arsimit, e Shkencës dhe Kulturës
SBASHK-u nuk është tërhiqur nga greva e nisur më 25 gusht, pavarësisht që Qeveria e Kosovës vendosi t’i ndajë nga 50 euro në muaj për secilin zyrtar publik nga shtatori deri në fund të vitit aktual fiskal.
Kujtojmë se grevat e mësimdhënësve i kanë kundërshtuar edhe Këshilli i Prindërve dhe Këshilli i nxënësve./KosovaNews.
