Mëngjesin e sotëm, më 5 qershor 2025, rreth orës 06:00, hetuesit e Njësisë për Hetimin e Trafikimit me Narkotikë në Prizren, në bashkëpunim me njësi të tjera të Policisë së Kosovës, kanë ekzekutuar një urdhër kontrolli të lëshuar nga Gjykata Themelore në Prizren.
Bastisja është kryer në shtëpinë dhe objektet përcjellëse të një të dyshuari 47-vjeçar në fshatin Zhur të Prizrenit, me dyshimin për posedim të paautorizuar të armëve dhe municionit.
Gjatë kontrollit, autoritetet kanë sekuestruar rreth 73 fishekë të kalibrave të ndryshëm, një armë e llojit DWR, një thikë me gjatësi tehu rreth 24 cm dhe një shufër gome, shkruan KosovaNews.
Pas përfundimit të veprimeve në terren, i dyshuari është shoqëruar në zyrat e Njësisë për intervistim. Pas konsultimit me prokurorin kompetent nga Prokuroria Themelore në Prizren, ai është liruar në procedurë të rregullt.
Hetimet për rastin janë duke u zhvilluar nga Njësia për Hetimin e Trafikimit me Narkotikë në Prizren.
Shënim: Personi i përmendur në këtë artikull prezumohet i pafajshëm derisa fajësia e tij të provohet me vendim të formës së prerë nga gjykata.
