Nëntoger Enis Cikaqi, oficer i Forcës së Sigurisë së Kosovës (FSK), ka diplomuar me sukses në kursin prestigjioz “Air Defense Artillery Basic Officer Leader Course (ADA BOLC)”, të mbajtur në Fort Sill, Oklahoma, ShBA.
Cikaqi është oficeri i parë nga Kosova që përfundon këtë program, duke shënuar një arritje të rëndësishme jo vetëm për karrierën e tij profesionale, por edhe për FSK-në në përgjithësi. Ky sukses vlerësohet si dëshmi e përkushtimit dhe profesionalizmit të oficerëve kosovarë që po përfaqësojnë vendin në programe ndërkombëtare të specializuara.
Nga FSK bëhet e ditur se pjesëmarrja dhe arritjet në këto trajnime jo vetëm që forcojnë aftësitë individuale të oficerëve, por sjellin edhe përvojë të vlefshme për ngritjen e kapaciteteve dhe zhvillimin e forcës.
“Forca e Sigurisë së Kosovës mbetet e përkushtuar në përkrahjen e oficerëve tanë në zhvillimin profesional dhe avancimin e standardeve të mbrojtjes dhe sigurisë së vendit,” thuhet në njoftimin zyrtar.
