Ish-kryeministri i Nepalit, KP Sharma Oli, është arrestuar të shtunën në mëngjes për vdekjen e dhjetëra njerëzve gjatë protestave të dhunshme në shtator që rrëzuan qeverinë dhe rezultuan në zgjedhje të reja.
Autoritetet arrestuan udhëheqësin e fuqishëm komunist në rezidencën e tij në periferi të kryeqytetit Katmandu. Ata arrestuan gjithashtu ish-ministrin e brendshëm, Ramesh Lekhak, i cili është akuzuar se ka urdhëruar autoritetet të qëllojnë mbi protestuesit.
Ministri i Brendshëm Sudan Gurung njoftoi arrestimet në mediat sociale.
“Askush nuk është mbi ligjin. Ne kemi marrë nën kontroll ish-kryeministrin KP Sharma Oli dhe ish-ministrin e brendshëm Ramesh Lekhak,” tha Gurung. “Kjo nuk është hakmarrje kundër askujt, është vetëm fillimi i drejtësisë.”
Një hetim nga një komision i ngritur nga qeveria kërkoi dënim deri në 10 vjet burg për Oli, Lekhak dhe shefin e policisë në kohën e protestave.
Arrestimet vijnë një ditë pasi qeveria e re e kryesuar nga ish-reperi Balendra Shah mori detyrën pas një fitoreje bindëse në zgjedhjet parlamentare në fillim të këtij muaji nga partia e tij, Rastriya Swatantra.
Shah dhe Gurung kanë premtuar drejtësi për të vrarët dhe të plagosurit.
Zgjedhjet ishin të parat në vend që nga protestat e udhëhequra nga të rinjtë kundër korrupsionit dhe qeverisjes së dobët më 8 dhe 9 shtator që lanë 76 të vdekur dhe më shumë se 2,300 të plagosur.
Turma të zemëruara dogjën zyrat e kryeministrit dhe presidentit, stacionet e policisë dhe shtëpitë e politikanëve të lartë që u detyruan të iknin me helikopterë ushtarakë.
Demonstratat e nxitura nga aktivistët e “Gjeneratës Z” detyruan Olin të jep dorëheqje dhe emërimin e kryeministres së parë femër të Nepalit, Sushila Karki, një gjyqtare e pensionuar e Gjykatës Supreme që shërbeu gjatë tranzicionit që çoi në zgjedhje
