Drejtoria Rajonale e Policisë në Gjakovë ka bërë të ditur se ka arrestuar një person, i cili dyshohet se më 28 shtator ka vjedhur një pushkë gjuetie në një shtëpi në Kijevë.
Sipas njoftimit, më 28 shtator, në stacionin policor të Malishevës, është raportuar një rast vjedhjeje e rëndë. Ankuesi, ka informuar se persona të panjohur kishin depërtuar me forcë në shtëpinë e xhaxhait të tij, në fshatin Kijevë dhe kishin vjedhur një pushkë gjuetie për të cilën pronari kishte leje.
“Pas veprimeve hetimore të kryera nga Sektori i Hetimeve, është arritur të identifikohet i dyshuari, një person i mitur shtetas kosovar. Pas intervistimit, i dyshuari ka pranuar kryerjen e vjedhjes. Policia ka sekuestruar gjësendet e vjedhura, përfshirë një pushkë gjuetie, 13 fishekë, një thikë dhe një mbajtëse të fishekëve (rrip). Me vendim të Prokurorit të Shtetit, i dyshuari është ndalur në mbajtje për 24 orë”, thuhet në njoftimin e Drejtorisë Rajonale të Policisë në Gjakovë.
