Ministri i Mbrojtjes, Armend Mehaj dhe komandanti i FSK-së, Bashkim Jashari po qëndrojnë për viztitë në ShBA, me ç’rast po i shohin nga afër pajisjet më të reja ushtarake të cilat mund të merren për përdorim nga Ushtria e Kosovës – FSK, raporton KosovaNews.
Mehaj dhe Jashari udhëtuan dje për në Washington për të marrë pjesë në Konferencën Vjetore dhe Panairin e Industrisë së Mbrojtjes “AUSA 2022”.
Në panairin vjetor të Asociacionit të Ushtrisë së Shteteve të Bashkuara të Amerikës, ministri Mehaj tha se kanë takuar përfaqësues të kompanive më të njohura prodhuese të pajisjeve ushtarake.
Ai tha se po ashtu u njoftuam me zhvillimet më të fundit teknologjike në këtë fushë përmes prezantimeve informuese si dhe paneleve të diskutimit mbi tema ushtarake dhe të sigurisë kombëtare.
“Me ndryshimin e kushteve gjeopolitike, avancimin e teknologjisë, avancimin e bashkëpunimit me shtetet aleate, ngritjen e aspektit profesional të ushtrisë, jemi të interesuar që proporcionalisht të ngrisim edhe nivelin e investimit me pajisje ushtarake”, ka thënë Mehaj.
Ai thekoi faktin se gjatë vitit 2021 Kosova ka investuar në këtë drejtim 96% më shumë sesa në vitin 2019, ndërsa deri në fund të këtij viti pritet që investimi të jetë 99% më i lartë.
”Synimi ynë është që ushtria e Republikës së Kosovës të jetë e pajisur me armatimet më moderne ushtarake, e gatshme për të përballuar të gjitha sfidat e sigurisë”, është shprehur mes tjerash ministri Mehaj./KosovaNews/
