Trajneri i Kosovës, Alain Giresse, gjatë konferencës për shtyp tha se sulmuesi i Royal Antwerp, Arbnor Muja i kishte kërkuar atij që të jetë titullar në formacion, por një gjë të tillë e ka mohuar Muja në një deklaratë të bërë në Facebook
Arbnor Muja befasoi shumë kë me atë se ai do të luajë për Shqipërinë dhe jo për Kosovën, derisa sot gjatë një konference për shtyp, Giresse tha se sulmuesi kosovar i kishte kërkuar atij që të jetë titullar në formacionin e tij.
“Sa i përket Mujës, është ftuar, por nuk ka erdhi në nëntor për miqësore. Në mars ka qenë pjesë e ekipit tonë. Sa i përket këtyre lojëve tani, ai ka kërkuar garanci për vendin e titullarit. I kam treguar se këtë nuk e ka të sigurt askush. I kam treguar se nëse mendon kështu, më mirë është të mos vije, sesa të vije e të mos luajë”, kishte thënë Giresse.
Por, diçka tjetër ka thënë në një deklaratë në facebook Arbnor Muja, duke e quajtur këtë deklaratë të pavërtetë.
“Deri sot kam heshtur për çështjen e mosftesës sime nga selektori i Përfaqësueses së Kosovës, Alain Giresse. Por sot, nuk do të heshti! Deklarata e selektorit Giresse që unë i kam kërkuar vendin titullarë në ndeshjet e qershorit, është e pavërtetë”, ka thënë fillimisht në këtë deklaratë Muja.
Sipas tij, ai kishte pasur një diskutim me selektorin Giresse dhe ndihmësin e tij për pjesëmarrje në ndeshjet e marsit.
“Kërkesa ime ka qenë se ku qëndroj në planet e Selektorit Giresse për ndeshjet e ardhshme dhe pse nuk jam paraqitur kundër Izraelit dhe Andorrës dhe i kam treguar që mendoj që ka qenë e padrejtë mosprezenca ime në ndeshjet e marsit. Secili trajner dhe staf i tyre që ka punuar me mua, e dinë të gjithë që unë një gjë të tillë nuk e kërkoj kurrë! Emrin tim, selektori mund ta thërret, mund ta lejë në bankën rezervë, mund ta lejë edhe në tribuna, por kurrë ta njollosë”, ka thënë Muja në këtë deklaratë ku në fund i ka uruar sukses “përfaqësues së Kosovës duke mos e quajtur atë Kombëtare.
Kosova më 16 qershor do të jetë nikoqire e Rumanisë, kurse pas tre ditësh do të luajë në udhëtim ndaj Bjellorusisë.
