SHBA-të janë të gatshme t’i ofrojnë Arabisë Saudite një pako armatimi me vlerë mbi 100 miliardë dollarë, kanë deklaruar për Reuters gjashtë burime të njohura drejtpërdrejt me këtë çështje, duke thënë se propozimi po përgatitet për t’u bëri i ditur gjatë vizitës së presidentit amerikan, Donald Trump në mbretëri saudite.
Pakoja e propozuar vjen pas përpjekjeve të pasuksesshme të administratës së ish-presidentit, Joe Biden për të finalizuar një pakt mbrojtës me Riadin si pjesë e një marrëveshjeje më të gjerë që synonte normalizimin e marrëdhënieve midis Arabisë Saudite dhe Izraelit.
Propozimi i Bidenit ofronte qasje në armë më të avancuara amerikane në këmbim të ndalimit të blerjes së armatimit kinez dhe kufizimit të investimeve të Pekinit në vend. Reuters nuk mund të konfirmojë nëse propozimi i administratës Trump përfshin kërkesa të ngjashme.
Gjatë mandatit të parë, Trump e kishte paraqitur shitjen e armëve Arabisë Saudite si të dobishme për krijimin e vendeve të punës në SHBA.
Lockheed Martin pritet të furnizojë një sërë sistemesh të avancuara armatimi, përfshirë aeroplanë transporti C-130, sipas dy burimeve. Njëri prej burimeve thotë se Lockheed gjithashtu do të furnizojë raketa dhe radarë.
Pritet që edhe kompania RTX Corp, e njohur më parë si Raytheon Technologies, të ketë një rol të rëndësishëm në këtë pako, e cila do të përfshijë edhe furnizime nga furnitorë të tjerë të mëdhenj amerikanë të mbrojtjes si Boeing, Northrop Grumman Corp dhe General Atomics.
Të gjitha burimet kanë refuzuar të identifikohen për shkak të ndjeshmërisë së temës.
Ndryshe, mbretëria saudite kishte kërkuar për herë të parë informacion për dronët e General Atomics që në vitin 2018. Gjatë 12 muajve të fundit, është vënë në fokus një marrëveshje prej 20 miliardë dollarësh për dronët MQ-9B SeaGuardian të General Atomics dhe avionë të tjerë.
Disa drejtues të kompanive të mbrojtjes po shqyrtojnë një udhëtim në rajon si pjesë e një delegacioni.
