Përfaqësuesi i Kosovës për marrëdhënie me NATO-n, ambasadori Astrit Zemaj ka vazhduar me takimet e tij me zyrtarët e lartë të NATO-s.
Kësaj here Zemaj është takuar në Komitetin Ushtarak të NATO-s me admiralin Rob Bauer, i cili është kryetar i Komitetit Ushtarak të Organizatës së Traktatit të Atlantikut të Veriut (Chair of the Military Committee – NATO).
“Admirali CMC Bauer është autoriteti më i lartë ushtarak i NATO-s dhe njëkohësisht edhe Këshilltar Ushtarak i Sekretarit të Përgjithshëm të NATO-s dhe i Këshillit të Atlantikut të Veriut-NAC”, ka njoftuar Zemaj.
Ambasadori Zemaj theksoi se Kosova është mirënjohëse për kontributin e NATO-s dhe të KFOR-it për paqen dhe stabilitetin në vend.
“Vendi ynë është mirënjohës për kontributin e jashtëzakonshëm të NATO-s dhe KFOR-it ndër vite, dhe në veçanti për punën e përbashkët për të qenë partner i besueshëm dhe promovues i paqes, sigurisë dhe stabilitetit në Kosovë dhe në mbarë rajonin”, tha ai.
Zemaj u shpreh se do të vazhdojë të kontribuojë për “të ardhmen tonë euroatlantike dhe të forcimit të subjektivitetit tonë ndërkombëtar”.
