Ambasadori i Gjermanisë në Kosovë, Jorn Rohde, ka uruar Gresa Caka-Nimanin për rizgjedhjen e saj në postin e kryetares së Gjykatës Kushtetuese.
Rohde ka thënë se Gjykata Kushtetuese është një gardian i domosdoshëm i kushtetutshmërisë së Kosovës.
Gresa Caka-Nimani është rizgjedhur kryetare e Gjykatës Kushtetuese.
Kushtetuesja ka njoftuar se në seancën administrative të mbajtur më 05.06.2024, gjyqtarët e kësaj Gjykate e kanë rizgjedhur kryetaren aktuale edhe për një mandat të dytë.
Mandati i dytë në krye të kësaj Gjykate do të jetë 3-vjeçar.
Herën e parë, Caka-Nimani është zgjedhur kryetare e Gjykatës Kushtetuese më 17.05.2021.
Deri në emërimin e saj në Gjykatën Kushtetuese, Gresa Caka-Nimani ka shërbyer si këshilltare e lartë ligjore dhe udhëheqëse e ekipit të Zyrës për Demokraci dhe Qeverisje në Agjencinë Amerikane për Zhvillimin Ndërkombëtar (USAID).
