Përveç rasteve në punë ndaj ish-funksionarëve të lartë të PDK-së, LDK-së dhe AAK-së, hetuesit e Task Forcës Antikorrupsion në Policinë e Kosovës kishin nisur hetime të shumta të rasteve edhe për ministrat e Qeverisë Kurti II si dhe zyrtarë të tjerë të lartë të institucioneve publike.
Ambasadori i Kosovës në Kroaci, Martin Berishaj, ishte një ndër personat të cilët po i hetonte kjo Task Forcë.
Task Forca Anti-korrupsion e majorit Shemsi Haziri, e kishte inicuar vetëm rastin ndaj Berishajt, të cilit edhe i kanë ngritur kallëzim penal nën dyshimin për shmangie tatimi, më pas hetimit janë zgjeruar edhe për shpërlarje të parave.
Hetimet për rastin Berishaj janë në proces. Deri më tash hetuesia ka bërë disa vizita në disa shtete për hetimin e këtij rasti.
Në hetimin e këtij rasti janë të përfshira shtetet si Kosova, Shqipëria, Bosnja, Mali i Zi dhe Sllovenia. Me të gjitha këto shtete, pikë e vetme kontakti me policinë për këtë rast ishte shefi i Task Forcës, Shemsi Haziri. Deri më tash dihet se Martin Berishaj ka pranuar mbi 1.5 milion euro në bankën NLB nga kompania GEN me seli në Beograd dhe dy ditë më pas i ka tërhequr kesh këto para.
Gjithashtu, Martin Berishaj në llogarinë e tij në Mal të Zi, dihet se ka pranuar mbi 600 mijë euro nga GEN me seli në Beograd. Ndërsa, në këtë llogari në Mal të Zi, ka pranuar edhe miliona të tjera, por nga burime të tjera, të cilat ende nuk dihen nga saktësisht.
Rast tjetër, i cili ka lëvizur tërë Qeverinë dhe mazhorancën e Kuvendit është arrestimi i Kryeshefit të KEK-ut, Ragip Krasniqi. Edhe për këtë të fundit, rasti ishte inicuar vetë nga Task Forca antikorrupsion, të cilët Krasniqin e kanë e kanë intervistuar në prill 2022, nën dyshimin se kishte lidhje me Martin Berishajn, të cilët dyshoheshin se ishin takuar në një vizitë në Kroaci, së bashku me disa kompani që merreshin me shit-blerjen e energjisë.
Sidoqoftë, gjatë zhvillimit të hetimeve, Task Forca ka arritur të gjejë prova për përfshirjen e tij në dhënien e disa kontrarave një burimore, të dyshimta se ishin lidhur në mënyrë të kundërligjshme, të cilat kapin vlerën rreth 22 milionë euro, ku dyshohet se ai kishte favorizuar kompanitë e caktuara, duke ushtruar ndikim tek zyra e prokurimit në KEK.
Nagip Krasniqi po hetohet nga task forca antikorrupsion edhe në një rast tjetër, sërish për energji, por kësaj radhe nën dyshimin për mënyrën e pazareve me shit-blerjen e energjisë.
Sipas rezultatit të hetimeve të Task Forcës, rezulton se janë 5-6 kompani që merren me shitblerje të energjisë, ku njëra prej tyre, përkatësisht, kompania sllovene HSE nuk është e licencuar për shit-blerje të energjisë në Kosovë. Pavarësisht kësaj, prej dhjetorit 2021, KEK i ka shitur HSE 37 milionë euro, ndërsa KEK i ka blerë prej HSE 5 milionë euro energji. Kjo dëshmohet edhe përmes vërejtjeve që ZRE ua kishte bërë KEK-ut, që mos të bëjnë pazare me HSE pasi nuk kishte licencë, por përkundër kësaj, Kryeshefi i KEK-ut, Nagip Krasniqi, kishte urdhëruar që me HSE të vazhdonte tregtimin i energjisë në mënyrë të kundërligjshme.
Pas arrestimit të Nagip Krasniqit, ZRRE për pazare të kundërligjshme në lidhje me tregtim të energjisë e kishte gjobitur KEK-un me 3.2 milionë euro dhe Operatorin e Sistemit të Transmetimit dhe Tregut (KOSTT) me 439 mijë euro.
Pas heshtjes së gjatë të krerëve të institucioneve, të cilët kanë injoruar letrën e Shemsi Hazirit, më në fund, kishte ardhur një reagim nga ministri i Brendshëm Xhelal Sveçla. Ky i fundit, kishte thirrur në një takim maratonik nga disa zyrtarë nga drejtoria e hetimeve si dhe shefin e Task Forcës, Shemsi Hazirin. Takimi ishte mbajtur në Blinajë më 3 mars 2023 dhe kishte zgjatur 12 orë.
Burime të “Betimit për Drejtësi” brenda këtij takimit kanë konfirmuar se ministri Sveçla, i kishte thënë Shemsi Hazirit se pse e ka ngritur me shpejtësi kallëzimin penal kundër Martin Berishajt.
Haziri i ka thanë se ky rast ka qenë i argumentuar me prova për shmangie nga tatimi. Tutje, Sveçla i ka thënë atij se nëse kanë prova se “edhe kjo qeveri është e korruptuar, le të ngrisin raste edhe ndaj tyre”.
Haziri ju ka përgjigjur se PO, janë duke i hetuar edhe disa raste të kësaj qeverie, por nuk i ka përmendur emra.
Një ndër rastet për të cilat kishte pasur debat në këtë takim, kishte qenë rasti “Beni Dona”, për të cilin Shemsi Haziri, kishte shkruar letrën njoftuese për krerët e institucioneve.
Pavarësisht, shqetësimeve të ngritura nga Haziri se tenderët milionësh i ka fituar “Beni Dona” me dokumente të falsifikuara, kjo kompani ka vazhduar të marr tenderë milionësh nga Policia e Kosovës edhe në kohën e Qeverisë Kurti.
Task Forca Anti-korrupsion në Policinë e Kosovës, aktualisht është duke hetuar së paku pesë ministra dhe një zëvendësministër të Qeverisë.
Ministri i Financave, Hekuran Murati po hetohet në lidhje me rastin e dëmtimit të mësimdhënësve, të cilëve dyshohet se në mënyrë të kundërligjshme ua kishte ndalur pagat gjatë kohës së grevës.
Për këtë rast, ishte bërë kallëzim penal, të cilin Task Forca po e heton. Ministri Murati është ftuar nga Task Forca që të intervistohet në hetuesi në cilësinë të të dyshuarit, por ai ka refuzuar, duke kërkuar që të intervistohet në zyre të tij. Hetuesit e Task Forcës nuk e kanë pranuar kërkesën e Muratit.
Se si do të veprohet, mbetet të shihet ditëve në vazhdim.
Ministrja e Punëve të Jashtme, Donika Gërvalla është ministrja tjetër që po hetohet nga Task Forca e policisë, së bashku me zëvendësministren Liza Gashi dyshohen për dhënien e 1 milion e 40 mijë eurove për “Caritasin Zviceran”, ku kjo e fundit, ka angazhuar për kryerjen e shërbimeve OJQ-në Germin, në të cilën Liza kishte qenë drejtoresh para se të bëhej zëvendësministre. Deri tash i janë paguar “Caritasit 344 mijë euro.
Ministri i Pushtetit Lokal, Elbert Krasniqi, në një rast që po hetohet nga Task Forca, për keqpërdorim të detyrës zyrtare, për shkak se dyshohet se në një rast ku në mënyrë të kundërligjshme rreth 300 mijë euro janë shpenzuar për projekte për minoritetet.Të ngjajshme
Ministrja e Ekonomisë dhe Ndërmarrësisë, Rozeta Hajdari, është ministrja e radhës që po hetohet nga Task Forca, nën dyshimin se keqpërdorim të detyrës zyrtare për shkak të keqpërdorimit të rezerave shtetërore, përkatësisht në lidhje me blerjen e miellit dhe vajit, për të cilat është dëmtuar buxheti i shtetit.
Ministri i Kulturës, Hajrullah Çeku së bashku me disa zyrtarë të tjerë të lartë të kësaj ministie, është intervistuar nga Task Forca, nën dyshimin se kjo ministri ka dhënë një kontrate për konsulencë mbi 130 mijë euro, ku konsulenti i angazhuar si arkitekt vendor, paguhet 5 mijë e 550 euro në muaj.
As Ministria e Infrastrakturës e udhëhequr nga Liburn Aliu nuk ka mbetur pa u hetuar nga Task Forca antikorrupsion. Në këtë ministri po hetohet zëvendës ministri Hysen Durmishi, në lidhje me tenderin e tiketave, për të cilin pas nënshkrimit, ishte zbrapsur.
