Pas raportimit të KALLXO.com se kryeprokurori i Prokurorisë Themelore në Gjakovë, Ramiz Buzhala i ka dërguar pyetje të testit një kandidati për bashkëpunëtorë profesionalë, ka reaguar edhe ministrja e Drejtësisë, Albulena Haxhiu.
Haxhiu përmes një postimi në Facebook ka thënë se janë të panumërta ankesat që adresohen në Ministri të Drejtësisë lidhur me procedurat e rekrutimit në sistemin e drejtësisë, sipas saj lajmi i publikuar sot nga KALLXO.com është arsye e mjaftueshme për nisjen e hetimeve dhe suspendim e kryeprokurorit Buzhala.
Postimi i plotë i ministres Haxhiu:
Janë të panumërta ankesat që adresohen në Ministri të Drejtësisë lidhur me procedurat e rekrutimit në sistemin e drejtësisë. Kandidatët në vazhdimësi ankohen për punësimin e familjarëve, miqve pra për procese të kurdisura.
Lajmi i sotëm nga portali kallxo.com, që kryeprokurori i Prokurorisë Themelore në Gjakovë, i ka dërguar pyetjet një kandidati për bashkëpunëtor profesional (por që gabimisht ia ka dërguar gazetares), është arsye e mjaftueshme për nisjen e hetimeve ndaj kryeprokurorit dhe suspendim të tij.
Tejkalimi i detyrave, favorizimi i kandidatëve dhe keqpërdorimi i pozitës nuk duhet të tolerohen!