Në një pasdite të zakonshme në Bern, mes shumë lojtarëve që ndjekin ëndrrën e futbollit, spikat një djalosh 18-vjeçar me rrënjë nga Kosova. Ai është Albion Sinani – një emër që me shumë mundësi do ta dëgjojmë shpesh në të ardhmen.
Albioni futbollin e nisi në moshën 6 vjeçare dhe që atëherë, futbolli është bërë pjesë e pandashme e jetës së tij. Me disiplinë dhe punë të palodhur, ai sot është pjesë e klubit FC Breitenrain Bern, një skuadër që po i jep mundësinë të rritet dhe të shfaqë potencialin e tij.
Qetësia me topin, pozicionimi i saktë dhe aftësia për të lexuar lojën e bëjnë atë një mesfushor të kompletuar dhe të domosdoshëm për skuadrën. Në moshë të re ka qenë edhe pjesë e skuadrës së İstanbul Başakşehir në Turqi.
18 vjeçari tregoi edhe synimet për të ardhmen. Ëndrra e tij më e madhe është të luajë një ditë në një nga ligat elitare të Europës, por zemra e tij rreh fort për Kosovën. Ai dëshiron të nisë rrugëtimin me fanellën dardane që nga grupmoshat, e të arrijë deri tek Kombëtarja A.
Por përtej fushës, Albion Sinani është një i ri me këmbë në tokë. Ai kalon kohën e lirë me familjen, që është gjithmonë pranë tij dhe ka qenë mbështetja më e madhe në rrugën drejt suksesit.
Është kjo lidhje e fortë me familjen që i ka dhënë forcë në momentet më të vështira dhe motiv për të mos u ndalur kurrë.
Në ndeshjen e fundit, Albion Sinani spikati si një nga lojtarët më të mirë të skuadrës. Ai dominon mesfushën me leximin e saktë të lojës, qetësinë me topin dhe aftësinë për të ndërprerë aksionet kundërshtare. Albioni është shembulli i një të riu që po ecën me hapa të sigurt drejt ëndrrës së madhe. Dhe ndoshta shumë shpejt, emri i tij do të jetë më i njohur – jo vetëm në Zvicër, por edhe më gjerë./dukagjini/
