Presidenti francez Emmanuel Macron bëri thirrje për qetësi përpara tubimeve të planifikuara këtë të shtunë në kujtim të një aktivisti të ekstremit të djathtë, i vrarë javën e kaluar.
Ai njoftoi se javën e ardhshme do të zhvillojë një takim me kryeministrin dhe ministrat përkatës për të diskutuar çështjen e grupeve të dhunshme.
“Në Republikë, asnjë dhunë nuk është legjitime. Në Republikë, vetëm forcat republikane mund të veprojnë sepse ato mbrojnë rendin republikan. Nuk ka vend për milicitë,” deklaroi Macron gjatë hapjes së sallonit vjetor bujqësor në Paris.
Ai theksoi se qeveria është në gatishmëri për të garantuar që marshimet të zhvillohen pa incidente.
Tubimet organizohen në kujtim të Quentin Deranque, 23 vjeç, i cili u rrah për vdekje gjatë një përleshjeje të filmuar nga kamerat, ngjarje që tronditi opinionin publik. Policia ka shprehur shqetësimin se marshimet mund të përshkallëzohen në dhunë, me përplasje mes grupeve rivale, transmeton Euronews Albania.
Marshimi më i madh pritet të mbahet në orën 15:00 në Lyon, qyteti ku ndodhi vrasja dhe ku ka një prani të grupeve të ekstremit të djathtë dhe atyre antifashiste.
Sipas Ministrisë së Brendshme, pjesëmarrja pritet të variojë nga 2,000 deri në 3,000 persona, ndërsa tubime më të vogla janë paralajmëruar edhe në disa qytete të tjera të Francës.
