Policia e Kosovës ka kryer një operacion në një banesë në lagjen “Tre Rrokaqiejt” në Mitrovicë të Veriut, në bazë të informacioneve se aty ka laborator droge.
Këtë e ka konfirmuar për KosovaNews, zëvendësdrejtori rajonal për veriun, Veton Elshani, i cili tha se gjatë aksionit janë konfiskuar gjëra të shumta që janë të ndaluara me ligj.
Ai ka thënë se i dyshuari serb nuk ka qenë në shtëpi gjatë kontrollit të policisë, në të cilën janë konfiskuar pajisje për laborator [droge], për kriptovaluta, shok-bomba, armë, municione.
“Pas informacioneve të pranuara nga sektori për luftimin e narkotikëve, Mitrovica Veri në bashkëpunim me Drejtorin Rajonale Veri ka kryer një kontroll në një banesë në rrugën e Kolashinit saktësisht në katin 11 në ndërtesën në lagjen “Tre Rrokaqiejt”. Në banesën që është shfrytëzuar nga S.M. (Kosovar Serb) janë gjetur dhe konfiskuar 60 kartela grafike, makina antiminer S9, 13 ventilator, poqa elektrikë që shfrytëzohen për rritjen e bimëve të kanabisit, llampë elektrike për laborator, 51 fishekë , 8 shokë bomba të modifikuara. I dyshuari nuk ka qenë aty”, ka thënë Elshani.
Kjo nuk është hera e parë që Policia e Kosovës kryen aksione kundër drogës, apo kundër kriptovalutave në veriun e Kosovës, të banuar me shumicë serbe.
Në shkurt të këtij viti policia zbuloi tre laboratorë droge në Mitrovicë të Veriut.
Po ashtu, në maj të vitit të kaluar, policia kishte shkatërruar dy laboratorë droge në Izvor, afër kufirit me Serbinë, ku ishin gjetur edhe sasi të mëdha të bimëve narkotike, të llojit marihuanë. Në prill të atij viti, ishte shkatërruar një laborator droge në Zveçan dhe ishin arrestuar katër serbë.
Autoritetet e rendit gjithashtu kanë kryer disa aksione në Kosovë – përfshirë në veri – kundër mihjes së kriptovalutave.
