Një aksion policor është zhvilluar sot në shtatë lokacione në Kosovë, me ç’rast edhe janë arrestuar shtatë persona të dyshuar për vepra të ndryshme penale.
Në një njoftim të përbashkët të Policisë dhe Prokurorisë Speciale, thuhet se personat e arrestuar dyshohen për hyrje në sistemet kompjuterike, mashtrim dhe shpëlarje të parasë.
“Me urdhër të Prokurorisë Speciale (PS), Policia e Kosovës ka ndërmarr një aksion në shtatë lokacione të ndryshme të Kosovës, ku janë arrestuar shtatë (7) persona të dyshuar për vepra të ndryshme penale. Prokuroria Speciale dhe Policia e Kosovës, njoftojnë opinionin se gjatë këtij aksioni janë sekuestruar disa vetura, armë, municion, mjete të konsiderueshme materiale, si dhe prova të tjera materiale të cilat dyshohen se janë përdorur për kryerjen e veprave penale”, thuhet në njoftim.
Tutje theksohet se aksioni është zhvilluar në shtatë (7) lokacione të ndryshme me dyshimin se personat e ndaluar janë përfshirë në kryerjen e veprave penale, ‘’Hyrje në sistemet kompjuterike’’, ‘’Mashtrimi’’ dhe ‘’Shpëlarje e parave’’.
