Xhudisti Akil Gjakova është dërguar në mbajtje për 48 orë, nën dyshimin për dhunë në familje.
Lajmin e ka konfirmuar Shkodran Nikçi, zëdhënës i Prokurorisë Themelore në Pejë.
Nikçi tha se Gjakova u ndalua mbrëmë në kufi dhe më pas është marrë nga zyrtarët policorë të Stacionit Policor në Pejë, ndërsa pas intervistimit, me urdhër të prokurorit të shtetit, është dërguar në mbajtje për 48 orë.
Xhudisti Gjakova, një ditë më parë u shpall në kërkim nga Policia e Kosovës, për veprën penale “Dhunë në familje”. Ai dyshohet se ushtroi dhunë ndaj bashkëshortes.
Të martën, Federata e Xhudos përmes një reagimi kanë thënë se dënojnë fuqishëm çdo formë dhune, por besojnë në pafajësinë e Akil Gjakovës.
“Federata e Xhudos e Kosovës dënon fuqishëm çdo formë dhune dhe jemi thellësisht të shqetësuar për ngjarjet e fundit në vendin tonë. Ne e kemi për prioritet të mbrojmë dhe të promovojmë barazinë gjinore, e cila është e vërtetuar me arritjet kulminante dhe përkrahjen e shkëlqyeshme të sportisteve tona. Ne besojmë në pafajësinë e Akilit dhe urojmë që organet e rendit të drejtësisë sa më parë të zbardhin rastin. Andaj ftojmë mediat të tregojnë maturi në trajtimin e këtij rasti dhe të ndalojnë njollosjen dhe gjykimin publik të një nga figurave që vazhdon të promovoj imazhin pozitiv të vendit tonë. Akili momentalisht ndodhet jashtë territorit të Kosovës, dhe do të dorëzohet menjëherë tek organet e rendit dhe të drejtësisë në momentin që do të arrijë në Kosovë”, thuhej në reagimin e Federatës.
