Ish-nënkryetari i Lidhja Demokratike e Kosovës dhe figura e njohur politike në Podujevë, Agim Veliu, ka reaguar ashpër ndaj zhvillimeve të fundit brenda partisë, duke bërë të ditur se refuzon të jetë pjesë e listës së kandidatëve për deputetë në zgjedhjet e 7 qershorit.
Në një reagim publik drejtuar anëtarëve, aktivistëve dhe simpatizantëve të LDK-së, Veliu ka falënderuar mbështetësit për besimin dhe kontributin e tyre ndër vite, ndërsa ka kritikuar lidershipin aktual të partisë për mënyrën e menaxhimit të saj.
Ai ka deklaruar se nuk dëshiron të rikthejë në vëmendje “goditjet ndaj tij dhe degës në Podujevë”, përçarjet e brendshme apo humbjet zgjedhore të LDK-së, por është ndalur te ajo që po prezantohet si “Bashkimi i madh”.
Sipas Veliut, është paradoksale që në këtë proces po përfshihen pikërisht personat që më herët ishin “anatemuar dhe eliminuar” nga strukturat drejtuese të partisë.
Veliu ka zbuluar se para zgjedhjeve të 28 dhjetorit 2025 kishte shprehur publikisht gatishmërinë për të kandiduar për deputet, mirëpo, sipas tij, kandidatura ishte refuzuar nga kryesia e degës me arsyetimin se ishte “vendim i shefit të madh (Lumirit)” që ai të mos ishte pjesë e garës.
“Ndërsa sot e njëjta kryesi, me bekimin e shefit, më paska propozuar të jem në listën e kandidatëve për deputetë. Madje pa më kontaktuar dhe pa më konsultuar fare”, ka shkruar ai.
Në reagimin e tij, Veliu ka theksuar se nuk largohet nga LDK-ja, pasi e konsideron atë pjesë të jetës së tij politike që nga themelimi, por ka bërë të qartë se nuk pranon të përdoret politikisht.
“Refuzoj të përdorem dhe të jem pjesë e një projekti që e largon partinë nga identiteti i saj institucional e shtetndërtues”, thuhet në reagim.
Në fund, ai është shprehur i bindur se LDK-ja do të rikthehet në “rolin e saj historik si forcë përgjegjëse shtetformuese”, duke shtuar se partia është “më e madhe se interesat meskine të dy njerëzve”.
