Aeroporti Ndërkombëtar i Prishtinës “Adem Jashari”, ka njoftuar se stafi tokësor i kompanisë “Deutsche Lufthansa”, ka paralajmëruar grevë nga data 27 korrik 03:45 deri më 28 korrik, ora 06:00.
Kjo pritet të ndikojë në operimet e kompanisë “Lufthansa” në aeroporte të ndryshme në të gjithë vendin.
“Gjatë kësaj kohe ‘Lufthansa’ ka të parapara disa fluturime për në ANP ‘Adem Jashari’ LKIA: nga/për në Mynih, Duseldorf, Shtutgart, Frankfurt, dhe udhëtarët tanë që udhëtojnë me këtë linjë ajrore në datat e lartpërmendura mund të kenë anulime, vonesa të mëdha, apo edhe bagazh të humbur/vonuar”, thuhet në njoftimin për media.
Prandaj, ANP “Adem Jashari” ka lutur udhëtarët që udhëtojnë me “Lufthansa”, të jenë në kontakt me përfaqësuesit e kompanisë ajrore nëse ndodh ndonjë anulim/vonesë e fluturimit të tyre.
Tutje, thuhet se së fundmi shumë aeroporte të Bashkimit Evropian janë prekur nga grevat e punonjësve që po ndodhin atje.
“Siç kemi përjetuar disa ditë më parë, shumë valixhe mungonin dhe/ose vonoheshin nga aeroporte të ndryshme evropiane”.
Kompania “Lufthansa” njoftoi sot se punonjësit e saj kanë paralajmëruar grevë njëditore, e cila do të zhvillohet të mërkurën, por që për shkak të pasojave që do t’i sjellë kompanisë, është e detyruar të anulojë pothuajse të gjitha nisjet nga aeroportet e Frankfurtit dhe Munichut.
Gjithashtu u bë e ditur se orari i fluturimeve me shumë gjasa nuk do të normalizohet deri në fund të javës.
Në total janë anuluar më shumë se 1000 fluturime, ndërsa llogaritet se janë dëmtuar rreth 134 mijë pasagjerë.
Verdi, sindikata e linjës ajrore, ka thirrur rreth 20 mijë punonjës në një grevë që synon rritjen e pagave.
