Kryetari i Lidhjes Demokratike të Kosovës (LDK), Lumir Abdixhiku, ka reaguar pas përleshjeve fizike që ndodhën gjatë seancës të enjten në Kuvendin e Kosovës, mes deputetëve të Partisë Demokratike të Kosovës (PDK) dhe Lëvizjes Vetëvendosje (LVV).
Abdixhiku e ka cilësuar këtë ngjarje si “një episod i errët i historisë parlamentare në vend” dhe ka theksuar rëndësinë e kohës aktuale për Kosovën dhe të ardhmen e saj si shtet.
Ai ka theksuar se dhuna nuk është një mjet për të arritur qëllimet politike dhe se ajo nuk duhet toleruar.
Kreu i LDK-së ka shtuar se dhuna në Kuvendin e Kosovës është një shëmti dhe e shpërfytyron demokracinë dhe kulturën politike.
“Një episod i errët i historisë parlamentare në vend; në një kohë kritike për Republikën dhe të ardhmen tonë si shtet. Dhuna nuk është mjet, nuk ishte as sot e nuk ishte as dje. Dhuna në Kuvendin e Kosovës është shëmti. Ajo shpërfytyron vet demokracinë dhe kulturën politike për të cilën kemi nevojë si shoqëri”, ka shkruar ai në Facebook.
Nga ana e tij, LDK-ja e refuzon këtë qasje dhe gjithashtu refuzon gjuhën polarizuese dhe përçarëse që, sipas tij, është bërë një standard sjelljeje për pushtetin.
“LDK e refuzon këtë qasje si mjet. Siç dhe refuzon gjuhën polarizuese, përçarëse e nxitëse që është bërë tashmë standard i sjelljes së pushtetit”, ka shkruar tutje Abdixhiku.
Kryetari i LDK-së ka ka theksuar se rruga e Kosovës duket se është e humbur, dhe se vendi ka nevojë për një rrugë të re, të tretë, që do ta bënte atë një vend normal, të zhvilluar dhe euroatlantik.
Abdixhiku u ka bërë ftesë të gjithë qytetarëve të bashkohen në këtë rrugëtim të LDK-së drejt një zgjimi kolektiv dhe vendosjes së vlerave euroatlantike.
