Kryetari i Lidhjes Demokratike të Kosovës (LDK), Lumir Abdixhiku, ka thënë se kërkimi i listave të punonjësve që do të marrin pjesë në grevë për t’ua ndalë mëditjet nga pagat nga ana e Qeverisë, është presion ndaj tyre dhe kërcënim ndaj proceseve demokratike në vend.
Abdixhiku përmes një postimi në Facebook, të enjten, ka thënë se ky është narracioni i një pushteti autokratik që sipas tij, deri dje premtoi mirëqenie e zhvillim.
“Ky është narracioni i një pushteti autokratik që deri dje premtoi mirëqenie e zhvillim, sot shpërndanë frikë e kërcënim. Kërkimi i listave të punonjësve në grevë nga ana e Qeverisë përveçse presion i drejtpërdrejtë ndaj punëtorëve të sektorit publik është dhe kërcënim ndaj proceseve demokratike në vend dhe vet shtetit juridik. Sot, shoqëria kosovare duhet të rreshtohet prapa mësuesve, mjekëve e shërbyesve publik që me plot të drejtë, në krizën më të madhe ekonomike, kërkojnë dialog, dinjitet e përballueshmëri”, ka shkruar Abdixhiku.
Sipas tij, ndërprerja e kontratave për punëtorët në këtë kohë krize, është goditja më e rëndë që një qeveri mund t’u japë qytetarëve të vet.
“Ndërprerja e kontratave të tyre, në këtë kohë krize, është goditja më e rëndë që një Qeveri mund t’u japë qytetarëve të vet. Kështu nuk duhet të duket Kosova demokratike, kështu nuk duhet të trajtohen punëtorët tanë. Kryeministri i premtimeve, që sot s’mund ta mbajë asnjë, po dëshmon, si çdo ditë, që është i paaftë për të menaxhuar me vendin, kërkesat qytetare e krizat e mëdha”, ka thënë kryetari i LDK-ë.
Greva e përgjithshme e paralajmëruar nga Bashkimi i Sindikatave të Pavarura të Kosovës ka nisur të enjten dhe sipas njoftimit, do të vazhdojë deri në realizimin e kërkesave të punëtorëve, për 100 euro shtesë në muaj deri në miratimin e Ligjit për Pagat.
Qeveria ka paralajmëruar se greva nuk është thirrur sipas ligjeve në fuqi dhe se do t’ua ndalë në pagë mëditjet të gjithë grevistëve për kohën sa nuk do të jenë në punë.
